Политичката десница го изолира Георгиевски

Какви му се шансите да го преживее вмровското цунами. Кој и што ги раздели Георгиевски и Додовски - Црвенковски или Груевски; идеологијата или интересот?!

Александра М. Митевска


ВМРО-ДПМНЕ отсега ќе си има работа со Љупчо Георгиевски, се закани поранешниот премиер (1998-2002), откако довчерашниот претседател на ВМРО-Народна, Марјан Додовски, објави ликвидација на партијата и се врати во старото јато. Дали заминувањето на блискиот соработник на Георгиевски кај Никола Груевски е само уште еден заплет во историјатот на релациите меѓу ВМРО-ДПМНЕ и Народна, кој е испишан со многу контроверзии и забивања нож во грб?


ФОРМАЛНИ ЛИДЕРИ


Во изминатите седум години од формирањето, повеќепати и' беше предвидуван крај на партијата што Георгиевски ја основаше по тензичната разделба со Груевски и ВМРО-ДПМНЕ, по претседателските избори во 2004 година. Но, Георгиевски тврди дека последниот одлив на кадри во ВМРО-ДПМНЕ не значи епилог ниту за Народна, ниту за неговата политичка кариера. Тој возврати со најава дека овој пат ќе го преземе кормилото на партијата, во која досега беше само почесен претседател, препуштајќи им ги водечките позиции на најблиските соработници, кои еден по еден го напуштаа и, главно, заминуваа кај Никола Груевски, а некои политички се пасивизираа. Прво Весна Јаневска се врати во ВМРО-ДПМНЕ, потоа Ѓорѓи Трендафилов исчезна од политичката сцена, а сега и Додовски му сврте грб на Георгиевски, обвинувајќи го за соработка со СДСМ.

„Нема да ја поддржиме коалицијата со Бранко Црвенковски и нема да се печеме во бизнис-кујната на Георгиевски“, рече Додовски и замина кај Груевски.


РЕЛАЦИИ

Шушкањата за релаксирање на односите меѓу некогаш лутите противници Црвенковски и Георгиевски, поточно за блиска соработка меѓу СДСМ и ВМРО-НП, всушност, не се од вчера, туку влечат корени уште од самите почетоци на партијата на поранешниот премиер и лидер на ВМРО-ДПМНЕ. Веќе подолго време (особено откако СДСМ ја промовираше идејата за проширување на опозицискиот фронт)самиот Георгиевски јавно кажува дека за него и за неговите следбеници е поприродна комуникација со социјалдемократите отколку со поранешните сопартијци од ВМРО-ДПМНЕ.

Народна се формираше за време на владеењето на СДСМ, откако беше прогласен за неуставен членот од Изборниот законик што предвидуваше пратеник да го изгуби мандатот ако премине во друга партија. Со тоа се отстрани пречката повеќето пратеници од ВМРО-ДПМНЕ да заминат во новоформираната ВМРО-НП, која во парламентарниот состав до 2006 ја имаше најбројната и најгласната пратеничка група во опозицискиот табор. Од друга страна, многу од проектите на тогаш владејачкиот СДСМ беа протуркани во парламентот со поддршка од пратениците на Народна. Повеќето од тие пратеници, во годините што следеа, се враќаа еден по еден во ВМРО-ДПМНЕ, која, во меѓувреме се врати на власт, но на чело со Груевски. Многумина од нив и сега се на високи позиции во владините ешалони.


ИДЕОЛОГИЈА


ВМРО-НП солидно го помина првиот изборен тест во 2006, кога преку самостоен настап освои шест пратенички места. Тогаш беше направен и првиот обид за потиснување на анимозитетите меѓу некогашните сопартијци, преку соработка врз основа на декларираната идеологија на ВМРО-ДПМНЕ и ВМРО-НП, како партии на десницата. Пратениците на Народна ја повикаа ВМРО-ДПМНЕ да не коалицира со партијата што произлезе од ОНА, и покрај победата на ДУИ во албанскиот камп. Тогашната владејачка коалиција на ВМРО-ДПМНЕ и на ДПА се формираше благодарение на ВМРО-НП (и на НСДП) која го поддржа Груевски, по принципот на малцинска Влада. Но, предвремените избори во 2008 не завршија добро за Народна, која, воопшто, не учествуваше во трката за пратеници и оттогаш е вонпарламентарна партија.

Додовски, завчера, меѓу другото, изјави дека преминува во ВМРО-ДПМНЕ и поради тоа што што мисли дека тоа е вистинското ВМРО и дека ја застапува вистинската демохристијанска идеја.

Тој и Георгиевски се појавија заедно на коктелот што во јуни 2010 го организираше ВМРО-НП, по повод „20-годишнината од обновувањето на идејата на ВМРО во Македонија“. Тоа беше паралелна манифестација контра големата прослава што ја направи ВМРО-ДПМНЕ за 20. роденден на партијата. Георгиевски и Додовски тогаш го застапуваа ставот дека актуелното раководство на ВМРО-ДПМНЕ ја фалсификува историјата, бидејќи во нејзините редови немало личности кои би можеле да зборуваат за историјатот на партијата.

НЕСУДЕНИ ПАРТНЕРИ

Деновиве од таборот што му остана лојален на Георгиевски го обвинуваат Додовски дека пред ланските вонредни избори ја осуетил идејата за формирање коалиција на десничарските партии што произлегоа од ВМРО-ДПМНЕ и дека со тоа и' помогнал на владејачката партија да добие шест-седум пратенички места повеќе. Четирите помали десничарски партии (ВМРО-НП, ОМ на Љубе Бошкоски, Демократска десница на Филип Петровски и Достоинство на Стојанчо Ангелов), кои настапуваа самостојно на изборите, вкупно освоија близу 56 илјади гласови, што да отидеа на едно конто, сигурно ќе резултираа со пратенички места. Само ВМРО-НП доби повеќе од 28 илјади гласови.

Повеќе партии произлегоа од ВМРО-ДПМНЕ во изминатата деценија. Борис Змејковски, Доста Димовска, Марјан Ѓорчев..., и нивните приврзаници, сепак, се вратија во матичната партија, откако не успеаја да ги етаблираат на политичката сцена новите партии што ги формираа. ВМРО-НП е една од ретките што успеа да се одржи околу седум години, иако е во постојан слободен пад. Георгиевски сега најавува дека ќе ја релативизира партијата, откако конечно ќе го преземе кормилото.