Аиво Орав на брифинг во Атина

Молк во Атина за поканата на Груевски до Пападимос

Од нашиот дописник
Миркица Поповиќ



Атина - Новиот евроамбасадор за Македонија, Аиво Орав, денес во Атина ќе има работна средба со грчката алтернативна министерка за надворешни работи, Марилиза Ксенојанакопулу. Пред официјалното преземање на функцијата во Скопје, Орав доаѓа да разговара за е��роинтеграцијата на Македонија, при што се очекува да го отвори и прашањето на билатералните односи меѓу нашата земја и Грција. Во Атина сметаат дека е корисно што Орав доаѓа на брифинг за грчките позиции пред да биде официјално поставен на должноста шеф на делегацијата на ЕУ во Македонија.

Грција останува на ставот дека однесувањето и изјавите на македонската Влада само ја отежнуваат преговарачката клима наместо да ги подобрат шансите за брз напредок и наоѓање решение за името. Портпаролот на грчкото МНР, Григорис Делавекурас, изјави вчера дека македонската Влада постојано ја заострува нејзината позиција кон Грција преку разни изјави и активности.

Судејќи по неговата и изјавата на шефот на грчката дипломатија Ставрос Димас, на средбата со македонскиот министер за надворешни, Никола Попоски во Белград, Грција нема така лесно да заборави на поглавјето Вевчани.

„До ден-денес нема никаква официјална осуда на палењето на грчкото знаме на Карневалот во Вевчани. Чекаме да видиме промена на ставот на Владата што ќе ја подобри преговарачката клима“, истакна Делавекурас.

Делавекурас уште еднаш испрати порака до македонската Влада дека Грција има политичка волја за напредок на преговорите и дека го поддржува преговарачкиот процес во ОН предводен од преговарачот Метју Нимиц. Атина ја чека посетата на медијаторот на ОН на регионот и неговите средби со државниот врв на двете држави за да види дали има простор за напредок во разговорите.

Околу писмото-покана на премиерот Никола Груевски до премиерот Лукас Пападимос за средба каде било и натаму владее официјален молк, а одговор не успеал да извлече ни нашиот шеф на дипломатијата во разговорот со грчкиот во Белград, иако притискал за тоа прашање.