Мислења

МНР крие документи од Груевски!?

Филип Петровски

Премиерот бил лут кога дознал дека од него е скриена информацијата за Европското првенство во џудо, на кое имало средба на Љубе Бошкоски со Путин

На 12 и 19 септември лани пишував за ревизорскиот извештај за Министерството за надворешни работи. Ќе ве потсетам накратко - има поента. „Бев потврден од Државниот завод за ревизија. Имено, тој извршил ревизија во МНР за 2008 година за да провери дали финансиските извештаи, финансиската положба и активностите на МНР се во согласност со законската регулатива и дали државните пари наменски се користеле. Еве дел од тоа што ревизијата го утврдила. Околу 20 милиони денари не се вратени од нашите дипломатско-конзуларни претставништва (ДКП) во буџетот на РМ, што е спротивно на законот за буџетите. Од вкупно 54 наши ДКП само девет постапиле според инструкциите. Се сеќаваме дека министерот Милошоски за потребите на пропагандата казни неколку амбасадори со по некој процент од платата. Наводно, проценил дека не се доволно активни. Но, не се сеќаваме дека казнил или на кој било начин обелоденил дека 45 наши претставништва во странство не постапувале според законот за буџет и дека не ги вратиле парите. Ревизијата утврдила дека е можен пристап во електронската база на податоци на сметководството на МНР, дури и по завршувањето на фискалната година. Тоа упростено значи дека секој може, по потреба, да ги менува податоците за да прикаже состојба што му одговара. Тоа создало мешање на податоците и неможност хронолошки да се провери како настанале трошоците. Да потсетам дека менувањето на податоците во деловните книги е спротивно на Законот за сметководство на буџетите и буџетските корисници. Ревизијата наведува дека и во 2006 година е констатирана истата состојба, но министерот како одговорно лице не презел активности за нејзино надминување. А требало да побара од Јавното обвинителство, преку испраќање на извештаите на ревизијата, да отвори истрага и да утврди кој е виновен за потрошените пари“. На тоа застанав.

Идната недела, намерно, продолжив да изнесувам за јавноста уште детали од ревизискиот извештај, како и политичка оцена на работата и (не)дејствувањето на министерот. „Добивме министер што се затвори во својот кабинет и ја ’води‘ надворешната политика само со неколку луѓе. Тој е заинтересиран да посети што повеќе семинари и да се прошета. Неговиот кабинет е составен од пријатели и од роднини. Упатените знаат дека не е воопшто заинтересиран како функционираат останатите делови на Министерството и на амбасадите. Па, затоа и може да му се случи да се исплатуваат илјадници евра во амбасадите за режиски трошоци, со пресметки што не соодветствуваат со вистинските сметки. Потоа, само ако министерот е незаинтересиран за законито работење, може да се случи да се потрошат два милиона денари за службени патувања во 15 амбасади на лица од секторот за финансиско и материјално работење, што требало да помогнат да се изработат месечните извештаи за финансиското работење. Во исто време, во амбасадите има со решение задолжени лица да ја вршат токму таа функција. Тие за тоа примаат и додаток на платите. Ревизијата констатирала дека токму поради ова се создава концентрација на функциите, што е ризик од необјективно прикажување на расходите. Одозгора на се', низа ДКП не доставуваат финансиски извештаи, со што се оневозможува каква било објективна контрола“.

На ова премиерот не реагираше. Премолча. Како што реков тогаш, сега ќе повторам: министерот му одговара со својата молчалива, кротка, препредена поза. Не бранува. Поддржува антиквизација. За возврат добива свое трло. Свој дел од колачот каде што може да прави што сака. В ред, така ја разбираат демократијата. Добиле мнозинство и според тоа нема што сега да се правдаат или да внимаваат како работат. Сега е време да се вработат роднините и да се испратат во амбасадите по нивна желба. А зошто да има конкурс, кога може и без него да се испратат, божем на испомош, всушност, на прошетка. Не ќе биде лошо МНР да објави колку роднини на министерот се вработени во тоа Министерство и колку од нив се денеска во македонските амбасади. Кога веќе така ја практикуваат власта, зошто се срамат да го кажат тоа на јавноста. Имаат комотно мнозинство и никој не им може ништо.

Еве уште неколку примери за „законската работа“ на МНР, а воедно и на Антонио Милошоски. Еден македонски неделник во две продолженија пишуваше неодамна за „Амбасадорска ОКТА во Прага“. Имено, помпезно најавуваните и убаво искористени за пропагандни цели купувања амбасади, како што изгледа, не се многу чисти! Притоа се наведува како спорно и купувањето на дипломатските претставништва во Виена, Љубљана, Москва и во незаобиколната Прага. Посебно е интересен случајот во Прага, каде како главен актер се појавува блискиот другар на Милошоски, Игор Илиевски. Не е јасно како е можно човекот што ги склопил бизнисите во Прага, од позиција на државен секретар, подоцна да замине во истиот град како амбасадор. И никој од државните авторитети да не реагира. Односно, сето тоа се покрива. Чудно е како се развива кариерата на овој амбасадор. Како што досега сум пишувал, тој во 2006 година под чудни околности се појави во ДПМНЕ.

Како и да е, бидејќи во МНР се зафатени со бизниси, пред нос им поминуваат значајни и помалку значајни надворешно-политички настани. Како пример ќе ја наведам средбата на Љубе Бошкоски со рускиот премиер во Виена. Таа одекна како бомба на домашната политичка арена. Сите се прашуваа како е можно да се оствари таква средба, особено кога се знае дека премиерот за четири години мандат со Путин не се сретнал. Иако сака и преку лобисти постојано се обидува до неа да дојде. Замислете колкав публицитет таква средба би добила во медиумите што ја поддржуваат Владата. Е, за овој настан, односно за доаѓањето на Путин во Виена, постои информација во МНР што навреме била испратена. Но, според мои сознанија однатре, информацијата министерот му ја премолчел на премиерот. Не е јасно дали поради зафатеноста со вработувањето на сопственото семејство или затоа што кокетира со Обединети за Македонија. Како и да е, премиерот бил сериозно лут кога дознал дека од него е скриена информацијата за Европско првенство во џудо. И секако, дека со подобра организација можел тој да оствари средба со Путин. Имало црвенеење во премиерскиот кабинет, а не е исклучено и викање. Полека им станува јасно и на понеупатените дека македонската дипломатија, како и многу други министерства, се користи за вдомување кадар што стекнува предност само по лична и по партиска линија.

За жал, минатото време никој не може да го врати. Тоа е неповратно изгубено, а Македонија тапка во место. Сетете се само на срамот со амбасадорот во Албанија, кога цела тамошна јавност го исмеа кандидатот. Да не зборуваме за другите амбасади. Секаде состојбата е иста или полоша. Затоа не очекувајте резултати. Гледајте сеир. А јас повремено ќе ги потсетувам сите што се случува во приватниот посед на Антонио Милошоски.

(Авторот e доктор по политички науки)

http://filippetrovski.blog.mk/