Македонски состојби

За партијата и за Груевски се работи!

Манчо Митевски

Третина од земјоделците ги користеле парите од субвенциите за изградба на куќи, набавка на апарати за земјоделството, а некои биле и на одмор!

Избори се ближат. Во овие четири години граѓаните на Македонија добро го сфатија и го научија новокомпонираниот турбо фолклор на владејачката партија. Без разлика кога точно ќе се одржат изборите, ВМРО-ДПМНЕ ја почнува кампањата со маратонска прослава на 20-годишнината на партијата. Прославата на партискиот роденден ќе биде искористена да се промовира според партиските стратези и спин-доктори, добитнички изборен адут, спакуван во патриотско-популистичкиот слоган „За Татковината се работи“! На овој начин партијата се подготвува да им фрла прав в очи на граѓаните за да не ги гледаат очајните состојби во сите сфери на животот, со кои ќе почне да ја бомбардира опозицијата: неисполнети на стратегиските интереси на земјата за влез во НАТО и во ЕУ, закочен процес за изнаоѓање компромис за името, нерешени егзистенцијални проблеми на граѓаните - сиромаштија и невработеност, колапс на стопанството, стагнација на развојот, неисполнети ветувања за инвестиции, нарушени меѓунационални односи, загрозена безбедност, отсуство на дијалог, поделби и политичка криза...

Во Македонија се создава предизборен амбиент, кој се карактеризира со две веќе видени ситуации: нарушување на меѓунационалните односи, кои сериозни аналитичари ги споредуваат со оние од 2000/2001 година, и форсирано градење еден вид постбукурешка психоза со актуализирање на темите за одбрана на името и во тој контекст поделби на патриоти и предавници. Теренот за ваквите теми што треба да и' дадат шлагворд и запаливост на изборната ретирика е подготвен за дел од гласачкото тело во текот на четирите години владеење на ВМРО-ДПМНЕ со клучните стратегии.

Првата, со секојдневна изборна кампања 24/7 за розово боење на мозоците на луѓето, која владејачката партија ја практикува од 2006 година, од првото утро, по победата на изборите. Втората, со систематска идеолошко-кадровска трансформација на институциите врз принципите на вмровското поимање на власта и општеството, што значи општа партизација. Третата, со континуирано отворање коњуктурни одбранбено-заштитни теми за името, проширени и дополнети со копање во античкото минато во потрага по нов идентитет, притоа, ако не со сечење, тогаш со маргинализирање на нашиот светски признат словенски идентитет, јазик, култура и традиција. Четвртата стратегија е најпрагматична, бидејќи дава најопипливи изборни резултати и затоа ќе се обидам малку подетално да ја разработам. Таа е „подмачкување“ на цели социјални категории граѓани со буџетски пари, со идеја да се сетат на тоа кога ќе се најдат пред избирачките кутии. Оваа стратегија, која ВМРО-ДПМНЕ ја објаснува како грижа за народот и посебно за некои позагрозени социјални категории, опозицијата и аналитичарите ја толкуваат како корупција, односно купување гласови со парите на сите граѓани од буџетот. Линијата меѓу овие две позиции е многу тенка, често се прелева, а понекогаш и не се забележува. Но, кога се знае слабоста на лидерот Никола Груевски кон својот рејтинг и рејтингот на партијата, работите стануваат појасни. Значи, Владата е најгалантна кон земјоделците, пензионерите, студентите и учениците, кон државната администрација и - кон патриотите!

Деновиве, во печатот беа презентирани резултатите од едно истражување направено од Факултетот за земјоделство и храна околу користењето на парите од субвенциите. Според нив, една третина од земјоделците ги користеле парите од субвенциите за изградба на куќи, набавка на апарати за земјоделството, а некои со тие пари оделе на одмор, на патувања во странство, си купувале телевизори! И уште еден македонски изум, по сугестија на државата, со парите од субвенциите земјоделците ги намирувале заостанатите давачки кон државата! А субвенциите треба да се користат за осовременување и насочување на производството. Но, така ќе биде додека се даваат субвенции без критериуми и без контрола за земја, а не за производство. И особено кога наместо за стотина земјоделски фирми и околу десетина илјади индивидуални земјоделци, им се даваат на повеќе десетици илјади лица, кои имаат земја, а не се вистински земјоделци, бидејќи работат друго. И, таквите „земјоделци“ гласаат за ВМРО-ДПМНЕ! Затоа на Македонија и се случува, и покрај стотината милиони евра за субвенции, во овие четири години увозот на храна да стане речиси два пати поголем од извозот!

До настапувањето на економската криза, платите на државните и на јавните службеници редовно се зголемуваа и скокнаа за околу 22 отсто, но во последно време тоа се компензира со прием на неколку десетици илјади лица по договор на дело, претежно партиски војници. Слично е и со пензиите, кои пред да застанат, скокнале за околу 26 отсто. Затоа, сега власта тоа го компензира со бесплатно капење во бањите на 10.000 пензионери, кои добивале и тефтерче со порака од премиерот. Веројатно, да си запишат за да не заборават кој ги капел! Тука се и бесплатните петочни возења со автобусите на ЈСП. Студентите добија драстично намалување на партиципациите за студирање, факултети во своите гратчиња и села. Матурантите, идните гласачи, добиваа биометриски документи во училиштата без да се туркаат во МВР. Бесплатно лекување добија неосигураните, а сиромашните купуваат во СОС-маркети. Медиумите што работат за власта добија неброени износи пари за континуираните владини кампањи. Општините со градоначалници од владејачката партија се привилегирани со парични стимуланси за комунални проекти. Конечно, со околу 200 милиони евра за „Скопје 2014“, се купуваат националните сетила на групацијата која паѓа на лажен патриотизам. Оваа групација ќе има и бенефит, бидејќи според еден од идеолозите на антиквизацијата и кичот, со спомениците ќе си ја лекувале психата нарушена од историските неправди!

Никој разумен нема ништо против да им се зголемуваат пензиите и повластувањата на пензионерите, да им се дава на земјоделците, студентите и на сиромашните, но лошо е кога власта дава кога нема. Доволен доказ се предбанкротните состојби на државниот буџет, здравствениот и пензискиот фонд. Иако навидум купува за да победува, власта, всушност, распродава и губи. Најмногу губат граѓаните, државата и општеството: се уништуваат институциите, се деформираат вредностите, се нарушуваат меѓунационалните, меѓуетничките и меѓучовечките односи. Се' е во процес на делби!

Владејачката партија ја започна двомесечната прослава на 20-годишнината од формирањето на ВМРО-ДПМНЕ, под мотото „За татковината се работи“. (Во социјализмот имаше сличен слоган „За татковината со Тито - напред“!) Но, кога станува збор за ВМРО-ДПМНЕ, пораките треба да се читаат обратно. Зашто, со татковината се виде - тоне се' подлабоко. Но затоа, врхушката преродбеници се качува се' погоре на државниот и општествениот статусен и имотен графикон. Значи, не за Татковината - за Партијата и за Груевски - се работи!