Поглед

Кавгаџиски парламент

Оливера Војновска

Кога поранешниот претседател на Собранието, Љупчо Јордановски, пред пет години првпат симболично го отвори парламентот за народот, веројатно не претпоставуваше дека од овој настан ќе се прави скандал. А, токму тоа се случи на вчерашната традиционална манифестација, која падна во сенка на воведничарската кавга. Поради ексклузивитетот воведничари на трибините да бидат само пратеници од ВМРО-ДПМНЕ, опозицијата целосно ги бојкотираше дебатите. Опозиционерите се убедени дека се прави „груевизација на парламентот“.

Овој отворен ден на парламентот е замислен граѓаните одблиску да се запознаат како работи законодавниот дом. Вчера нивните домаќини, пратениците, им се претставија во најлошата светлина - раскарани и поделени.

Спикерот Трајко Велјаноски уверуваше дека во прашање е банална работа и дека никој немал намера да ја маргинализира опозицијата. Воведничарскиот пропуст го лоцираше кај организаторите на трибините - Европското движење во Македонија и „Мост“. Опозиционерите, можеби, навистина сето тоа претерано го издраматизираа. Но, факт е дека настанот се случи во Собранието. Тоа само по себе говори дека целата одговорност не може да биде упатена на адреса на двете невладини организации.

Шефот на парламентот, по дефиниција, мора да знае што се случува во „неговиот двор“. Впрочем, не морало да се чека опозицијата да крене врева, па тогаш да им се укаже на невладините при изборот на воведничарите да водат сметка за застапеноста на пратеничките групи и за етничкиот состав во парламентот.

Скандалот веројатно ќе беше избегнат доколку за ова навреме им се обрнеше внимание. Вака, наместо отворен и срдечен, граѓаните видоа еден кавгаџиски парламент.