Прекубројни или неподобни?

Паника меѓу административните работници по најавите за пребројување и прераспределби. Дипломатијата на удар откако прекумерните вработувања сопартијци доведоа до вишок вработени

Жаклина Хаџи-Зафирова

„Која вера сте“, „Колку деца имате“, „Брачен статус“, с�� само дел од прашањата што неодамна ги добиле административците, кои се зачудени која е целта на ваквата анкета меѓу вработените. Администрацијата се пребројува, а министерот за информатичко општество, Иво Ивановски, уверува дека нема простор за паника бидејќи само се „мапираат вработените во институциите“, за да се утврди каде има дефицит на кадри.

Тој најавува дека најдоцна до крајот на месецов ќе биде изготвен регистар на службеници, кој од поодамна се најавува и треба да ја каже конечната бројка на јавни службеници, вработени во разни државни институции, фондови, јавни претпријатија. Опозицијата се сомнева во најавите на министерот, коментирајќи дека досега неколку пати бил најавуван регистарот. Засега никој не ја знае точната бројка на административци, иако според некои процени таа се движи меѓу 120 и 160 илјади.

Администрацијата последниве години не се симна од листата на забелешки на Европската комисија, а влезе и во листата на нови обврски за Македонија, како дел од новиот дијалог кој се води меѓу земјата и ЕУ. Меѓу другото, од нас се бара да се подобри управувањето со човечки ресури. Македонија во изминатиов период беше посебно критикувана поради обемната администрација, што ги вклучуваше и вработувањата по Рамковен договор. А сега, со новите законски измени, опозицијата вели дека е проширен просторот за одбирање на подобните кадри.

„Порано имавме докази како беа примани кадрите во администрацијата. На пример, за раководител на сектор за меѓународна соработка се бара некој со Музичка академија. Сега нема да може да имаме увид во кадрите што се примаат бидејќи ќе бидат без оглас и без полагање на стручен испит. Исто така, претпоставениот е оној кој ги оценува административците. За да напредува, службеникот треба да биде одлично оценет. Но, ниту еден што не е член на ВМРО-ДПМНЕ нема одлични оценки. А, со две негативни оценки летате од работа“, вели Ана Павловска-Данева од СДСМ. Според неа е проблематично тоа што нема критериуми за оценка на службениците, што е случај во другите земји. Така што, тврди таа, се' е по вкусот на шефовите.

Во врска со најавите на министерот дека е при крај регистарот на јавни службеници, Данева вели: „Тој регистар требаше да биде готов прво во февруари лани, па беше најавен за јуни, па за есента минатата година, но се' уште не е готов, така што не се знае вкупната бројка на административци. Тоа ти е исто како да имаш семејство кое си го викнал на ручек, а немаш поим колку членови има семејството. Државата дава пари, а не знае колкав е бројот на јавни службеници“.

Министерот, вчера, во изјава за „Утрински весник“ потврди дека испраќале писма до институциите, но само во функција на регистарот на јавни службеници кој го најави за најдоцна десетина дена. Иако нашите информации велат дека се испратени писма до сите раководители низ државата да се изјаснат дали имаат вишок на вработени во своите редови.

„Станува збор за функционална анализа на секоја институција. Ние правиме мапирање на институциите што ќе пријават дека имаат суфицит и дефицит на некои кадри. Нема причина вработените да бидат во паника“, тврди Ивановски. Тој појаснува дека информациите што ќе ги добијат се во функција на новите законски измени за државни и јавни службеници, кои дозволуваат мобилност во институциите ако има потреба за тоа, а со цел да нема нови вработувања. Ивановски вели дека оценувањето на службениците е почнато уште од 2010 година, а за тоа дали некој е отпуштен од работа уверува дека сметка водат самите институции. Определбата на Владата за вработувања по Рамковен договор и понатаму останува“, вели Ивановски.