И дипломатијата се пребројува

Дипломатите се плашат дека со реформата на администрацијата место во амбасада можат да завршат во локална самоуправа

Слободанка Јовановска



Информациите дека македонската дипломатија е превработена и дека во рамк��те на реформата на администрацијата ќе се најдат на удар и овие кадри, предизвика паника во Министерството за надворешни работи (МНР). Се тресат од страв тие што се професионални но не се партиски кадри, се тресат тие што се од соодветна партија но од несоодветна струја, тие кои имаат високи звања но немаат конкретни задачи, тие што се пратени како рамковни но немаат соодветни квалификации, како и тие што се тука а не се подготвени за оваа професија.

Неофицијално се шпекулира со бројка од 200 непотребни, односно исто толку колку што се новопримени откако е на власт коалицијата на ВМРО-ДПМНЕ и ДУИ. Вработувањата во МНР и натаму не престануваат, па само пред два месеци биле примени пет нови кадри, покрај оние што доаѓаат на функции како амбасадори, државни секретари или други позиции од други институции или министерства, иако за државните секретари законот тоа не го дозволува.

Има ли Македонија навистина вишок дипломатија, е дилема која од МНР не ја потврдуваат, но не ни демантираат дека некои од нивните кадри можат да завршат, на пример во министерство за земјоделие или пак бивш амбасадор да добие работна позиција во некоја локална самоуправа.

„Се работи за информација на Владата која се однесува на сите институции на државната администрација. Целта е да се подбри ефективноста, ефикасноста и мобилноста на кадрите, соодветно со потребите и на ангажманот. Но нема бројна цел “, изјави вчера Борче Стамов, портпарол на МНР. Според него, не се планираат никакви отпуштања, а критериум за тоа кој е потребен а кој не е, ќе биде колку е некој функционално ангажиран или не е.

„Утврдувањето на недостиг или вишок на работна сила не е со цел да има отпуштање. Логичен критериум ќе биде степенот на ангажман од функционален аспект“, изјави Стамов. Неофицијално од МНР оценуваат дека се претерани бројките што циркулираат во јавноста и дека немаат толкав број на вишок вработени, а проценките ќе се прават допрва. Наспроти некои тврдења дека поради таа невработеност некои од вработените немаат работни задачи со месеци, а некои поради тоа и не доаѓаат на работа, во МНР велат дека сето тоа не е вистина и дека без дипломатски ангажман се само новопримените што мораат да се обучуваат на академијата. Неофицијално, сепак се навестува префрлање на оние што се со несоодветно образование, но ќе се внимава да нема уназадување.

Ексминистерот за надворешни работи, Антонио Милошоски, во чие време МНР нарасна од 300 вработени на 550 со тие во странство, не се согласува дека има вишок дипломати, туку проблем е штедењето, т.е. малиот буџет поради кој е мал и бројот на тие што можат да се испратати по амбасади, па останатите мора да седат дома. Вработени во МНР проблемот сепак не го гледаат во буџетот туку во партизацијата на МНР, па преместувањата сега ги сфаќаат како најава за политичко рекомпонирање на дипломатијата. Според нив одамна имало проценки колку кадри требаат во МНР, а фактот дека се примени исто толку нови колку што сега се бројат прекувработени, го посочуваат како најдиректен доказ. Клучно прашање, според нив, е кој е тој што ќе решава дали некој е добар дипломат или не, кога првите луѓе во МНР не се дипломати со кариера, а еден од државните секретари именуван минатата недела, како зајакнување од Агенцијата за државни службеници, не само што не е дипломат туку е инженер. Клучен аргумент е сепак дека дипломатијата не е само работно место туку и занает, така како што лекар не може да биде земјоделец, нешто што е светост во развиените земји каде дипломатите засекогаш си остануваат дипломати и само се ротираат на хиерархијата. По скандалозните информации за амбасадорот Перо Стојановски стана јасно дека дипломатијата треба да се проветри, но прашање е кој мотив ќе надвладее и дали ќе се следат реални критериуми. Во моментов МНР има дипломати кои со своето однесување се контрадефиниција на тоа што треба да бидат, одејќи дотаму што навредуваат, критикуваат и пцујат на социјалните мрежи, и држави и поединци. Односно, се однесуваат многу недипломатски.