Незаборав

Одбележена тригодишнината од смртта на Тоше

Во саботата жалеа Крушево, Македонија и Балканот - на тригодишнината од смртта на нашата најголема пејачка ѕвезда, Тоше Проески, се освети 33-метарски крст над манастирот „Свето Преображение“, а во утринските часови Крушево се разбуди со литургијата во црквата „Пресвета Богородица“.

„Полека се заокружуваат работите што ги сакаше и по кои мечтаеше Тоше“, ни рече Андреј Николовски, претседател на фондацијата „Тоше Проески“. Тагата по него не стивнува, но тој живее во сите нас - ни ги пренесе љубовта, верата и надежта. Тоше ја препеа вербата во Бога и во своите песни. Затоа музиката му е голема и искрена“.

Исто како и неговото срце. Вечното почивалиште на Тоше, Гумење, се нарекува светилиште. Безброј запалени свеќи измешани со солзи и пораки испишани на хамер што треба да отпатуваат до вечноста - „Никогаш нема да те заборавиме“, „Смртта не постои ако веруваш во Исус, љубовта не умира“, „Младоста не згаснува“ , се само дел од писанијата на оние што го сакаат.

„Така сме поблиску до него, во неговото Крушево, во неговата лулка“ - ни рекоа фановите од Србија, кои заедно со почитувачите на неговата песна од Хрватска, Словенија, но и од сите краишта на Македонија дојдоа да ја одбележат тригодишнината од неговата смрт.

Зборовите се мали и тесни како завиени сокачиња, а со нив треба да го опишеме неможното. Во саботата во Крушево, над темните и дождливи облаци, нашиот пркос да и' се инаетиме на судбината и на тој одозгора, засветли сонце и тогаш сфативме дека Тоше не е спомен ниту некогаш ќе биде. Тој продолжува да живее во сите нас. (В.Т.)