Фрлањето ѓубре пред 21 часот, може да ве чини 50 евра!

Скопјенец од Кисела Вода платил глоба оти отпадот го изнел во текот на денот, а не по 21 часот

Сања Наумовска


Избран лош тајминг или лоша среќа го снајде еден скопјанец, кој морал да плати 50 евра бидејќи фрлил ѓубре во контејнер надвор од определеното време! Комунален инспектор ја наплатил казната од граѓанинот што го изнел отпадот во текот на денот, а не по 21 часот, иако во Законот за јавна чистота не е прецизирано времето за исфрлување на сметот од дома. И во Градот Скопје потврдуваат дека времето кога се фрла ѓубре не е основа за казнување. Инспекторите треба да реагираат само доколку граѓаните создаваат диви депонии, ѓубрето го оставаат до контејнер или ако во садовите за отпад се остава градежен шут или делови од мебел.

Скопјанецот бил пресретнат од комуналниот инспектор веднаш пред контејнерите во близина на зградата каде што живее на улицата „Сава Ковачевиќ“. Инспекторот му предочил дека на контејнерите има налепница со која се информираат граѓаните дека ѓубрето треба да го фрлаат по 21 часот. А, бидејќи тој не го испочитувал тајмингот, добил казна!

Во Градот Скопје објаснуваат дека налепниците на контејнерите треба само да информираат кога е пожелно граѓаните да го фрлаат ѓубрето. Со тоа се зголемува ефикасноста во работата на Јавното претпријатие и се подобрува јавната хигиена во градот. Зошто скопјанецот платил глоба од 50 евра, не објаснуваат.

„Времето пропишано за фрлање на домашниот отпад е препорака со која треба да се обезбеди квалитетно и навремено подигање на сметот од сите делови на градот. Непочитувањето не е казниво, но добро е граѓаните да се придржуваат кон редот. И��спекторите и редарите, пак, можат да казнуваат само доколку се остава отпадот околу контејнерот“, велат во Градот Скопје.

Според комуналниот ред на Градот Скопје, „Комунална хигиена“ во различно време ги празни контејнерите во различни делови од Скопје. Во делови од општината Кисела Вода, каде што била изречена казната, изнесувањето на сметот треба да се прави ноќе, односно по 22 часот. Ноќе се празнат и некои од контејнерите во Центар и во Чаир. На пример, делови од Центар, кај „Рамстор“ и во Капиштец се чистат наутро до 10 часот, а деловите, на пример, кај „Палома Бјанка“, ноќе. Во различни делови од денот и ноќта ѓубрето се собира во Аеродром, Карпош, Ѓорче Петров и во други делови на Скопје. Поради тоа, велат во „Комунална“, граѓаните ги информираат преку налепниците на контејнерите. Наскоро, информираат од Јавното претпријатие, ќе биде спроведена и нова кампања за запознавање на сите граѓани со комуналниот ред.