Мое ќоше

Момчето од Дебарца

Ерол Ризаов

Историската улога на пазарџиите од Буњаковец како се прави успешна држава

На голема мака беа деновиве нашите жестоки критичари на ЕУ на НАТО, но и тие на Владата и на премиерот Никола Груевски. Едните, повеќе сакаат да го истакнат значењето на најпозитвниот и најреалниот извештај на Европската комисија за напредокот на Македонија и притоа открија дека Европа конечно се освести и ги увиде своите заблуди и грешки. Го најдоа и виновникот за тоа. На крајот заклучија, дека ниту ЕУ, ниту НАТО не се најдобро друштво, бидејќи се распаѓаат и се во длабока политичка и економска криза, за разлика нели од нас кои силно грабиме напред. Другите пак кои критички ја следат работата на Владата и на премиерот, прво ги видоа забелешките на администрацијата од Брисел во економскиот дел, но останаа длабоко збунети од подготвеноста на Никола Груевски брзо да се најде заеднички прифатливо решение со Грција за името на државата. Нивната досегашна спремност за компромис за миг ја подголтнаа како кнедла.

Настана апсурдна ситуација, најголемите бранители на уставното име молчат за евентуалниот компромис во „рана фаза“ и за паралелни преговори со Грците, а најголемите довчерашни грчки платеници и предавници се подготвуваат да загинат за уставното име на државата. Оди сега најди му го крајот. Што направи политиката и војната за власт од луѓево.

Сепак најоригиналната анализа која до солзи ме изнасмеа е на Мирка Велиновска во „Нова Македонија“. Мирка со едно истражување во задоцнета фаза на скопското пазарче Буњаковец открила меѓу интелигентните пазарџии како Македонија стана успешна држава. Поточно го откри виновникот зошто Македонија за Брисел била неуспешна држва. Замислете за тоа бил најмногу виновен еден човек, Ерван Фуере, поранешниот амбасадор на ЕУ во Македонија. Ако беше тој тука, вели Мирка, ќе имавме радикално многу поинаков извештај. Иако, рака на срце, извештаите и за време на Фуере беа позитивни, ама не толку колку што треба. Мирка спектакуларно открива зошто е тоа така. Работата воопшто не била во доменот на големата политика, туку прилично бизарна која немала никаква врска со реалните состојби во државата. Неисе, Фуере си имал дечко и кажале на Мирка луѓето од пазарот кои добро ги „контаат“ работите. Дечкото не случајно бил од некое село од Дебарца, а во партнерај со Фуере го наместил еден политичар опозиционер. И сега гледајте како одат работите во високата политика. Опозицијата преку својот човек му кажува многу важни работи на дечкото од Дебарца, овој му ги кажува на Фуере, а овој на Брисел. Па така од таму нема ниту еден убав збор од 2006 година наваму се' додека не си заминал Фуере од Македонија. И потоа следи логичен заклучок на колешката: штом од видното поле ги снема Фуере, Талер, Кацин и Шацимаркакис и нивната медиумска тајфа, се смени европската перцепција за Македонија. Македонија без овие настрани типови и без предавниците во новинарството стана успешна држава. Една група сомнителни луѓе странци во спрега со домашни непријатели во медиумите со години лиферувала погрешна претстава за Македонија и од многу успешна, просперитетна и слободна држава создавала лажна слика за сиромашна и бедна земја со нарушени човекови права и слободи. Со нивното обезличување е разбиена илузијата дека цели тимови луѓе работат на подготовка од 250 до 300 страници извештаи за земјите кандидати за членство во Унијата. Тоа што се мери во микрони применливоста на европските стандарди во многу области, дека се работи за илјадници закони, одлуки, норми, бројки, што сто пати се премерува секоја ставка и цел еден надземен и подземен катастер за се' што има во Македонија замислете сето тоа било гола вода. Дечкото од Дебарца, симпатичниот амбасадор, и неговите пајташи одлучуваат дали една земја ќе добие позитивен, или негативен извештај од Брисел. Шокантно, дури и кога откритието е од Мирка и од пазарџиите на Буњаковец.

Боже, боже како одела работата, си замислувам како Бранко Црвенковски тој случајно е по потекло од Дебарца, му шепнува на уво нешто на момчето од Дебарца, тоа пак му шепнува на Фуере, а тој им шепнува на бирократите од Брисел, тие им шепнуваат на медиумите во Македонија и оп еве ти расипан телефон и дебели критики за страдна Макадонија. Сега сето тоа е исчистено. И искорнато. Македонија стана успешна држава без да мрдне со прст. Пропагандата прави чудеса. Чекам да ја видам уште „раната фаза“ за името на државата. Многу сакам да чујам кој што и на кого ќе шепнува овојпат. Ќе наминам до Буњаковец па ќе ви кажам.