„Ираклис“ ги запали страстите со македонските знамиња

Не е реткост на грчките првенства да се користат туѓи знамиња за да се изнервира спротивната екипа

Миркица Поповиќ


Фудбалот е најважната работа на светот. Тоа уште еднаш го покажаа и фановите на солунскиот фудбалски клуб „Ираклис“, кои по Солун, се подготвени денес да ја вандализираат Атина, и што е најинтересно за нас, провоцирајќи со македонски знамиња.

Изнервирани од одлуката на Грчката фудбалска федерација да им ја одземе лиценцата за настап во Суперлигата, фановите на најстариот грчки фудбалски клуб се фрлија по барање на правдата преку масовен протест придружен со стандарден навивачки вандализам.

Покрај скандалозното бојадисување со црна боја на Белата кула, едно од главните културно-историски обележја на Солун, навивачите предизвикаа големо бранување во јавноста откога неколкумина од нив извадија македонски знамиња на протестот.

„Ова не е држава! Ако Грција не знае да го почитува најстариот клуб, ќе одиме да играме во Скопје“, беа дел од коментарите на фановите на „Ираклис“ околу овој гест. Некои од поддржувачите ги сменија своите лични слики на „Фејсбук“ со слика од македонското знаме врз кое има принт на логото на „Ираклис“.

„Преместувањето на најстариот грчки клуб во втора лига е одраз е најголема навреда и непочитување и доколку Грција смета дека може така да се однесува, тогаш подобро е да се игра во друга држава“, гласеа коментарите на текстовите на блоговите и на форуми во врска со случувањата на протестите.

Македонското знаме во овој случај не беше поврзано со поддршка на нашата држава. Како што велат фудбалски фанови во Грција, честопати на натпреварите на солунските клубови со атинските може да се забележат турски и бугарски знамиња. Причините се чисто навивачки, да се испровоцира, или поточно, да се изнервира другата страна.

„Овој пат се фативте за знамето, како да не знаете што симболизира. На натпреварите на солунските клубови „Арис“ и ПАОК се забележуваат турски и бугарски знамиња, ама не, ние сега сме предавници. Како да не ви е јасно каде лежи проблемот. Да се отворат досиејата на сите клубови, па да видиме кој прв ќе затворат, дали Ираклис или останатите“, реагираа фановите на коментарите во кои ги напаѓаат дека се предавници и создаваат дополнителни проблеми и негативна слика за Грција, кои одат во прилог на Македонија.

Иако во телевизиските вести и весниците не се крена прашина околу овој настан, блоговите и форумите горат од жестоките дискусии околу последиците од овој потег. Спортските новинари и голем дел од Грците преку блоговите го осудија овој гест како атак врз сопствената држава во критично време за решавање на проблемот за името. Не беа ретки ни оние што навивачите од Ираклис ги карактеризираа како предавн��ци и им посакаа едно балканско „е, ако, нека ви ја одземат лиценцата кога вака се однесувате“, подвлекувајќи дека на ваков начин само ја губат поддршката и симпатиите од останатите фудбалски фанови во државата. Некои од блогерите на саркастичен начин побараа од грчката влада да му дозволи на клубот да премине во македонски редови поставувајќи во постовите и линк до веб-страницата на Македонската фудбалска федерација.

Како дојде до сево ова? Пред дваесетина дена фудбалската федерација одлучи дека поради финансиски проблеми, „Ираклис“ за 2010/2011 година не ги исполнува условите да добие лиценца за Прва лига. Најстариот грчки фудбалски клуб во последните две години е во сериозни финансиски проблеми. Неможноста до оваа година да го зголеми профитот и неисплаќањето на четворица странски играчи се само дел од причините за одлуката на фудбалската федерација клубот да премине во второлигашите на Грција. По нивната одлука, клубот поднесе жалба, која е предвидено денес да се разгледува во Федерацијата.

Огромен број навивачи што ноќеска заминаа за Атина без здив ќе ја чекаат конечната одлука. Нејзиното одбивањето ќе ескалира во нов бран протести и безредија од солунските фудбалски фанови, нешто што во последните месеци е секојдневје на граѓаните во Солун и во Атина.