Папандреу и Груевски, конечно, се согласија

И двајцата премиери сакаат решение за спорот, ама не се согласуваат околу начините

Македонскиот и грчкиот премиер, Никола Груевски и Јоргос Папандреу, вчера пак се соочија во Истанбул, но и овој пат не излегоа со детали околу средбата, освен воопштените оценки за спорот околу името. Според соопштенијата, средбата повторно била во конструктивна атмосфера и веќе идната недела двајцата премиери ќе имаат нова прилика да разменат мислења. Траела петнаесетина минути и се случила за време на заедничкиот ручек.

Генерално, на Самитот на земјите од Југоисточна Европа во Истанбул Папандреу најави подготвеност за поскоро решавање на спорот, а Груевски предупреди дека билатералните спорови не треба да се наметнуваат како критериум. „Ако билатералните проблеми и недоразбирања се наметнуваат како критериум, верувајте, тоа ќе создаде ситуација во регионот која ќе предизвика огромни проблеми. Статус-кво ситуација кон евроатлантските интеграции не носи добро за никого“, порача Груевски пред лидерите од регионот.

„Јас и Никола презедовме иницијативи и нови напори за да го решиме ова многу важно прашање. Секако, под покровителство и со посредништво на Обединетите нации, подготвени сме поскоро да го најдеме потребното заеднички прифатливо решение. Наоѓањето решение не е потребно само заради билатералните односи, туку и за да се испрати силен сигнал за целиот регион“, рече Папандреу.

„Средбата беше конструктивна. Разменивме мислења за состојбата во двете земји и за актуелниот проблем наметнат од Грција за нашето име. Мислам дека, конечно, Грција сфати оти од наша страна има волја за решавање на спорот. Неговата изјава дека двајцата сакаме да го решиме спорот е добар сигнал оти кај грчкиот премиер нема дилеми дека и двајцата сакаме да го решиме проблемот“, изјави Груевски по средбата.

Дали се работи за политичка куртоазија на самит на кој треба да се говори за подобра регионална соработка или за вистинска волја да се мрднат работите, сепак, не е јасно. Папандреу, патем, посочи дека грчка цел и визија е сите земји од Балканот да се приклучат кон европското семејство и да се воспостави динамика за решавање на регионалните проблеми што, како што нагласи, ги има многу.

Македонскиот премиер, од своја страна, тврдеше дека во Македонија остануваме доследни на патот за европските и евроатлантските интеграции, водејќи одговорна надворешна и безбедносна политика. За Македонија, како што посочи, евроатлантското сојузништво не е декларативно, туку е реална потреба и за нас и за нашите партнери.

„На тој наш пат имаме сојузници со кои не' врзува искрено пријателство. Затоа, и натаму ќе работиме кон јакнењето и продлабочувањето на заемната доверба и пријателство. Преку сопствениот пример ја покажуваме посветеноста кон заедничките европски и регионални вредности. Но, сите треба да бидеме свесни дека мирот, безбедноста и стабилноста несомнено се засноваат и на споделената одговорност. Само така можеме да ја градиме заедничката иднина на Балканот, а со тоа и на поширокиот заеднички европски простор“, истакна Груевски.

Според него, лошата слика од минатото на Балканот може да се надмине само со подадена рака на помирување и со промовирање иницијативи кои ќе ја унапредат меѓусебната доверба и разбирање. „Денес, повеќе од кога било, на нашиот регион му е потребно да биде дел од отворениот простор во кој има слобода на движење на луѓе, идеи, капитал и производи, но не каков било, туку отворен простор во кој секој во себе ќе ги носи своите права и својот идентитет и каде што сите ќе бидат почитувани за тоа што се, без оглед каде живеат и каде работат“, додаде тој.

Инаку, Груевски и Папандреу за последен пат се сретнаа на 17 јуни во Брисел, а имаат шест средби кои беа оценети како корисни за зголемувањето на довербата и разбирањето меѓу двете страни, но не донесоа напредок во решавањето на билатералниот спор за името. (С.Ј.)