Ало, „Пајак“, има возило паркирано пред мојата куќа!

На 072-253-253 може да се побара услуга општинскиот „пајак“ на Центар да тргне непрописно паркирано возило

Деспина Трајковска



„Конечно, го решивме проблемот со несовесните што ни паркираа пред влезот и гаражата на куќата, иако е јасно истакнато ‘Не паркирај, гаража‘. Благодарение на услугата што ја нудат од ‘Паркинзи на Општина Центар‘, веќе немаме секојдневни проблеми, што беше случај откако пред неколку години профункционира кафе-шемата на ‘Ленинова‘“. Вака коментира една повозрасна жителка на Дебар Маало, која во изминативе триесетина дена два пати побарала интервенција од Пајак-службата на Општинското јавно претпријатие и која за кусо време и' излегла во пресрет. Со едно јавување на дежурниот телефон, „пајакот“ одговорил на повикот и го отстранил непрописно паркираното возило.

Токму ваква е постапката за да се добие интервенција на Пајак-службата по повик на граѓани. Од претпријатието објаснуваат дека секој може да побара „пајакот“ да интервенира на терен, нормално, доколку е основано.

„За оваа намена на услуга е телефонот 072-253-253. Граѓанинот единствено треба да објасни од кои причини бара ’пајакот‘ да интервенира и доколку утврдиме дека барањето е основано, веднаш излегуваме на терен“, вели Маргарита Бакев, директорка на претпријатието.

Таа појаснува дека откако им профункционирала Пајак-службата, просечно дневно се регистрираат по 25 повици од граѓаните кои од разни причини бараат помош од „пајакот“. Најчесто, вели Бакев, граѓаните бараат „пајакот“ да крене возило кое непрописно им се паркирало пред влезот на гаражата, на приодот до куќата или, пак, неоправдано им го изб��окирало возилото.

Најчесто повиците на дежурниот телефон се од реонот на Дебар Маало и Универзална сала, а имало и барања за интервенција на „пајакот“ и во делови на Капиштец. Постојано на услуга на граѓаните, како што велат од „Паркинзи“, е едно од засега двете пајак-возила со кои располага претпријатието. Во иднина е планирано пајак-службата да се прошири.

Од „Градски паркинг“, пак, не планираат да им понудат слична услуга на скопјани. Не дека не сакаат, туку, како што велат, тоа е тешко изводливо на терен. Не сакаат да коментираат на кој принцип работат од „Паркинзи на Центар“.

„Тоа е сложена работа, бидејќи за секоја интервенција на ’пајакот‘ е потребна и асистенција на полицијата“, накусо одговараат од „Градски паркинг“.

Инаку, непрописно паркирани возила по улиците секојдневно ловат вкупно осум „пајаци“. Шест од нив се на „Градски паркинг“, а два на општинското претпријатие на Центар. И двете претпријатија наплаќаат речиси идентични казни на прекршителите. Единствената разлика е што градските „пајаци“ подигаат возила низ цело Скопје, додека оние на „Паркинзи“ само на територијата на општината Центар и тоа непрописно паркираните на општински улици.