Мое ќоше

Од чија партија се криминалците

Ерол Ризаов

Патриотизмот е последното скривалиште на мафијата

Криминалците од сите вери и нации имаат само една партија и една идеологија - парите. Најголемите од нив, секогаш ја бараат заштитата на политиката. Кога во тоа ќе успеат, таа заедничка работа на гангстерите и власта се вика организиран криминал. Кога пак криминалците ќе влезат во политиката и ќе се докопаат до власта тогаш тие си имаат и своја држава. Што мислите дали во Македонија мафијата има своја држава, или државата како и многу други си има своја мафија против која се бори, ама очигледно притоа бајаги забошотува. Некој горе постојано ја држи високо крената рачната кочница.

Јас мислам дека во прашање е ова второто со сериозна закана криминалците во Македонија да добијат и своја држава. Полициската акција „детонатор“ во Кочани, Виница и Крива Паланака вообичаено кај нас и за нас, отвори стара крајно глупава полемика: од чија партија се криминалците и насилниците. Ова јалово меѓупартиско врескање обично завршува со пребројување башка башка на вмровските и на сдсмовскитте ајдуци и арамии од оние на албанските партии со силни меѓусебни напади кој бил поголем крадец и кој прв почнал да краде и тепа. Се пенават до бесвест партиските војници и десни и леви преку парламентарни дебати, своите медиуми и преку социјалните мрежи да не' убедат дека сме ќорави при очи и дека не го гледаме тоа што секој ден го гледаме на очиглед на целата јавност. Колку е повидлива анархијата, хаосот и отсуството на правната држава, толку викотниците: држте го крадецот се поголеми. Насилието врз сите сетила на луѓето со груба, агресивна и валкана пропаганда не може да ги прикрие последиците од бандите што со години маршираат низ Македонија и предизвикуваат страв и трепет кај граѓаните. Затоа партиските штабови лиферуваат мобилизирачки соопштенија и куп дезинформации. Бадијала, трагите како на снег убаво се гледаат.

Главното прашање кои се причините за процутот на сите видови кримнинал во Македонија секогаш останува во истата фиока каде што е и одговорот. Имаше обиди на почетокот на транзицијата кога се појавија првите насилства под закрила на политиката, „Хард Рок“ и таканаречните диско тепачки, ова да се прикаже како производ на новото време и како колатерална штета на демократијата, што секако е многу погрешно бидејќи како одминуваше времето се покажа дека станува збор за непречен развој на криминалот. Институциите на системот и правната држава станаа немоќни посматрачи на трагичните последици од суровата битка за освојување на власта. Спрегите на политиката и подземјето станаа јасно видливи и во секојдневниот живот. Луѓето ги гледаат своите сограѓани со јајчести и бричени глави секоја вечер на ТВ во близина на највисоките македонски државни и партиски функционери, па потоа ги гледаат по кафулињата како збираат арач.

Тепачките во Скопје од деведесеттите години наваму прераснаа во хорди и банди кои го тероризираат населението во целата држава. Убиствата, крвавите пресметки со калашникови, пиштоли и бомби, киднапирања, уцени, трговија со луѓе, изнудување и рекет, проституција, комар, лихварство,разбојништва.... се највносните деловни гранки во Македонија. Новите босови богати како кнезови веќе се издвојуваат од уличната багра, се преоблекуваат во нови костуми и ги легализираат своите бизниси во други озаконети форми . Сега ним уличните бандити им се нелојална конкуренција и им е потребна помош на правната држава. Веќе се на добар пат да ја предводат новата македонска олигархија која од класични чорбаџии прераснува во агресивни бизнисмени кои уриваат се' пред себе со своите пари и моќ.

Акцијата на полицијата во Кочани секако е за поздравување. Ако е тоа почеток на една многу посложена и потешка операција на пресметка со причините на процутот на криминалот во Македонија тогаш тоа е навистина голема работа. Тоа би бил вистински почеток за инсталирање на правната држава што, се разбира, најмалку е работа само на полицијата. Дали е така многу бргу ќе се види ако се симнат ембаргата за апсења во повисоките ешалони на власта. Ако пак е селективна и спектакуларна диско и турбо фолк парада какви што веќе сме виделе тоа ќе биде само уште една тажна транзициска приказна без епилог. Ќе се вратиме каде што бевме. Во последното скривалиште на мафијата. Патриотизмот.