06.06.2012, 21:51 Сириза е за сложено име на Македонија со географска одредница
Алексис Ципрас во врска со прашањето за името, при денешното претставување на најважните ставови на неговата партија пред амбасадорите на земјите од Г20 во Атина
Сириза е за сложено име со географска одредница за севкупна употреби, изјави лидерот на грчката Коалиција на радикалната левица, Алексис Ципрас во врска со прашањето за името на Република Македонија, при денешното претставување на најважните ставови на неговата партија пред амбасадорите на земјите од Г20 во Атина.
Во врска со другите прашања од надворешната политика, тој рече дека ако неговата партија формира влада, таа ќе води „мултудимензионална и пацифистичка“ политика, но и силно ќе ги брани правата на земјата во рамките на ЕУ и ќе се стреми да придонесува во регионалните сојузи на Балканот и Медитеранот.
Тој, како што јави дописникот на МИА од Атина, додаде дека Сириза ја поддржува идејата Блискиот Исток да стане зона без нуклеарно оружје.
Што се однесува до грчко-турските односи, Ципрас рече дека е за дијалог врз основа на меѓународното право и взаемно почитување на националните суверенитети на двете земји. Тој ја поддржа асоцијацијата на Турција во ЕУ, но под услов соседната земја да не се заканува со војна против Грција.
Во однос на економската состојба во Грција и другите прашања, Ципрас рече дека Сириза „сака да се обиде и да постигне решение со партнерите, но таквото решение мора дефинитивно да стави крај на моменталната катастрофална ситуација“.
Тој го повтори својот став дека меморандумот – грчкиот договор за долгот со меѓународните кредитори, е катастрофален за земјата, но додаде и дека неговата партија не сака Грција да излезе од еврозоната.
- Напротив, програмата на Сириза е едниствениот начин Грција да излезе од кризата и да стане еднаква и вредна членка на Европската унија и еврозоната, рече Ципрас пред странските дипломати.
|
