06.06.2012, 14:36 Почина јапонскиот принц Томохито
Јапонскиот принц Томохито, прв братучед на царот Акихитo, почина денеска во Токио на 67-годишна возраст, по неуспешната борба со неколку болести, соопшти јапонската Царска палата.
Томохито, шестти по ред наследник на „тронот на Хризантемата“, почина во една токиска болница, откако, според написите на јапонските медиумите, последните денови виталните органи почнале да му откажуваат еден по еден.
Царската палата не ја соопшти причината за смртта на Томохито, но познато е дека тој боледуваше од неколку болести меѓу кои и рак на грлото. Од 1991 година беше подложен на неколку операции на грлото, а во 2007 година се лекуваше и од алкохолизам.
Томохито беше најстар син на принцот Микаса, помлад брат на претходниот јапонски цар Хирохито, кој беше татко на актуелниот монарх.
Јавноста го нарекуваше „брадест принц“, поради неговата бујна брада, невообичаена за припадниците на јапонското царско семејство.
Тој во 2005 година ги разбрани страстите во јавноста кога во еден текст напиша дека Јапонија прво треба да ги исцрпи сите опции, вклучувајќи и враќање на конкубиноте, пред да и дозволи на една жена да седне на царскиот престол.
Во тоа време ниту еден од двајцата синови на Акихито немаше машки наследник, па во Јапонија се разви дискусија околу наследството на тронот и можноста шеф на државата да стане жена.
Во меѓувреме, во 2006 година помладиот син на царот Акихито, принцот Хисахито, доби син, со што се разреши дилемата околу наследникот на престолот.
|
