05.06.2012, 12:10 Учениците ќе собираат стара хартија
Под мотото „Ослободи се! Однеси ја старата хартија во училишниот двор“, денеска во дворовите на училиштата низ државава учениците ќе собираат стара хартија. Акцијата ќе се спроведува по повод Светскиот ден на животната средина - 5 Јуни, а ја организира асоцијацијата „Ајде Македонија“ во соработка со Министерството за животна средина и просторно планирање и медиумската групација „Медија принт Македонија“ (МПМ).
Станува збор за селекција на старата хартија, која потоа ќе биде рециклирана. Во акцијата ќе можат да се вклучат сите граѓани и да ја искористат шансата да се ослободат од старите весници, списанија, тетратки, книги. Граѓаните ќе можат да ја остават старата хартија во пунктовите што ќе бидат лоцирани во училишните дворови, а ќе бидат отворени преку целиот ден. Преземањето и транспортот на собраната стара хартија ќе бидат организирани во соработка со општините и дистрибутивната мрежа на МПМ. За својот придонес училиштата ќе добијат најнови литературни дела од МПМ со кои ќе можат да си ја збогатат училишната библиотека.
Во текот на денот ќе биде организирана и дебата на тема „Модерни носачи на информации - Новите технологии во функција на почиста животна средина“. Еден од предавачите ќе биде и претседателот на Управниот одбор на МПМ, д-р Срѓан Керим, а најавено е учество и на неколку амбасадори, претставници на здруженија и организации, кои директно или индиректно имаат допирни точки со животната средина.
|
