„Интерарт“ и Министерството за култура склучија тригодишен договор за финансирање



„Државата директно застана зад стимулирањето на македонското современо танцово и кореографско творештво“, рече министерката за култура на денешната средба со Рисима Рисимкин, директор на културниот центар „Интерарт“

Министерството за култура и „Интерарт“ со кој раководи кореографот Рисима Рисимкин, склучија тригодишен договор за финансирање на програмите на овој културен центар со кој ќе се овозможи континуирано и квалитетно да се презентира најдоброто од современата танцова сцена. „Интерарт“ за прв пат во Македонија поднесе иницијатива за поддршка на претприемништво во културата, како европски и светски модел на делување во областа на културата. Договорот меѓу „Интерарт“ и Министерството ќе се реализира преку поддршка на проекти во Годишната програма за култура.

На денешната средба со новинарите, Рисима Рисимин истакна дека со ваков чекор стануваме лидери на модерниот балет во регионот. Министерката за култура, пак, Елизабета Канческа-Милевска, рече дека Министерството за култура направило опсежни анализи за степенот на застапеност на современиот танц во независната културна сцена. „Професионално, современиот танц е основна определба на ’Интерарт‘ културниот центар и Центарот за нови иницијативи во уметноста ’Локомотива‘, додека во групата аматерски и полупрофесионални се вбројуваат ’Ребис‘, ’Брејк а лег‘, ’Туту‘, ’Мак Моделс‘, ’Булфорг балет‘. Изразувајќи ја својата заложба за унапредување на сите сегменти во уметноста, Министерството за култура редовно во програмите од национален интерес ги поддржува субјектите чија основна определба е современиот танц“, рече Канческа-Милевска.

Таа додаде дека „Интерарт“ располага за сопствен простор и целосна инфраструктура за развој на современиот танц, а преку финансирањето на програмите од национален интерес на Министерството за култура, државата директно застана зад стимулирањето на македонското современо танцово творештво и македонското кореографско творештво.

„Донесувањето на одлука за поддршка на активностите на ’Интерарт‘, се однесува на препознавањето на вредностите кои овој центар ги развива на полето на развојот на современата танцова сцена во Македонија. Проектот претставува вистински исчекор во однос на развојот на претприемништво во културата, а Владата и Министерството преку овој чекор отвораат едно ново поле и нов хоризонт во поддршката на проектите од културата, следејќи ги светските примери, со што Македонија активно се вклучува во реализација на светски трендови и иницијативи, со кои се поддржува вистинскиот прогрес и развој во областа на современиот танц. Убедена сум дека со оваа поддршка се отвора нова можност и за поддршка на сите субјекти во културата кои работат на развојот на независната уметничка сцена во Македонија во областа на современиот танц“, рече Канческа-Милевска. (Т.И.)