Шестото издание на „Година на есејот“ во знакот на Миладиновци



Украинската писателка Ана Багрјана е годинашен добитник на повелбата „Академија на Медитеранот“

Украинската писателка Ана Багрјана е годинашен лауреат и добитник на повелбата „Академија на Медитеранот“, што ја доделува Медитеранската академија „Браќа Миладиновци“ од Струга. Во организација на Академијата, годинава на 7, 8 и 9 јуни ќе се одржи шестото издание на Меѓународната литературна манифестација „Година на есејот“, која ќе биде во знакот на браќата Миладиновци и одбележувањето на 150 години од нивната смрт.

На манифестацијата ќе земат учество повеќе есеисти, теоретичари и писатели од десет балкански земји, а ќе биде отворена и изложба во чест на Миладиновци, во организација на Сеучилиштето „Јосип Јурај Штросмаер“ од Осиек, Хрватска. И годинава ќе се одржи тркалезна маса, овој пат на тема „Ками и Медитеранот“, по повод 99 години од раѓањето на францускиот нобеловец Албер Ками.

Ана Багрјана е современ писател, есеист, поетеса, драматург, преведувач. Родена е во 1981 година во Фастив, Киевската област. Автор е на неколку книги и добитник на многубројни награди. Составувач е и преведувач на антологијата „Современа македонска поезија на украински јазик“. Во својата порака до Струга, Багрјана ќе напише: „Струга за мене е вистински волшебен и божествен град, каде што се вљубив на прв поглед во убавините, недогледот, спокојот и бреговите на Охридско Езеро и сето тоа се круниса кај мене како вистинска љубов, песна и бескрај, како неповторлива божествена убавина и земски рај што пееше струшкиот голем поет Константин Миладинов“.

Досегашни добитници на повелбата „Академија на Медитеранот“ се писателите Луан Старова, Јован Стрезовски, Горан Калоѓера од Хрватска, Сретен Перовиќ од Црна Гора и Радомир Андриќ од Србија. (Т.И.)