05.06.2012, 15:05 Тодоров им закажуваше прегледи на болните
Министерот за здравство Никола Тодоров денеска им закажуваше прегледи на пациентите кои за медицинска помош се обратија во градската општа болница „8 Септември“. Тој речиси четири часа седеше зад шалтерот и заедно со здравствените работници на болните им закажуваше термини за снимање на компјутерска томографија, магнетна резонанца или на некое друго снимање.
Тодоров го одбрал овој начин за да ги сними и проблемите кои се јавуваат при работата на шалтерите. Министерот вели дека можел да прати и дел од својот тим да ја истражат состојбата на терен, но сакал лично да види и да се увери со кои проблеми се соочуваат пациентите и персоналот на шалтерите. „Секогаш е подобро кога од прва рака ќе го видиш проблемите. Можеш да се распрашаш, да поразговараш со луѓето“, додаде Тодоров.
Министерот констатирал 14 проблеми во оваа болница, а еден од нив била и висината на шалтерите, поради што болните мора да се наведнуваат. Затоа тој добил идеја да ја промени висината, и шалтерите во болниците да бидат како оние во банките. Тодоров смета дека мерките на Министерството за здравство со кои се ограничи бројот на дневни снимања и пациентите со над еден месец чекање за преглед да се префрлат на Клиниката за рентгенологија, ги даваат резулатите. „Листите на чекање за одредени снимања се намалуваат. Пациентите, зависно од дијагнозата, досега чекаа и до еден месец, а сега листите на чекање ќе траат од 2 до 6 дена“, додаде Тодоров. И додека министерот ја уверуваше јавноста дека редиците за снимање се намалени, пациентите кои излегуваа од оваа болница и натаму велат дека чекаат и по еден месец за снимање. (Ј.Ј.)
|
