Владиниот тим од Шведска заминува во посета на Финска



Македонска владина делегација денеска ќе отпатува во Хелсинки, каде премиерот Никола Груевски треба да има средба со претседателот на Република Финска, Саули Ниинисто.

Владината делегација во Хелсинки ќе присуствува и на вечерата што во нејзина чест ја приредува амбасадорот на Канада во Република Финска Кристофер Шапраданов, кој по потекло е Македонец.

Пред заминувањето во Хелсинки, премиерот Груевски, кој со владината делегација од вчера е во посета на Кралството Шведска, во Стокхолм ќе има средба со спикерот на шведскиот Парламент, Пер Вестерберг.

Вчера во Стокхолм македонскиот премиер имаше средба со својот шведски колега, премиерот Фредрик Рајнфилд, како и со министеро�� за трговија, Ева Бјорлинг и со претседателот и извршниот директор на Шведскиот трговски совет, Улф Берг.

Премиерот Груевски, заедно со владиниот тим, присуствуваше на Бизнис форум на кој пред шеесеттина шведски компании беа претатвени можностите за инвестирање во Македонија.

Тој на потенцијалните инвеститори им порача дека деловната клима во Македонија постојано се подобрува, а шведските бизнисмени треба да ја посетат и да ги искористат најзините компаративни предности за инвестирање.

Од Финска, владината делегација заминува за Копенхаген каде македонскиот премиер ќе се сретне со премиерот на Кралството Данска Хелен Шмит, со претседателот на Парламентот на Кралството Данска Могенс Ликетофт, како и со претседателот на „Данск индустри“, Ди Карстен Дибвад.

Претседателот на Владата, со владиниот тим, ќе го посети и Осло каде што е предвидена средба со неговиот норвешки колега Јенс Столтенберг.

Покрај премиерот Груевски во состав на владината делегација се и вицепремиерот задолжен за економски прашања Владимир Пешевски, министрите за привлекување странски инвестиции Веле Самак и Бил Павлески, како и заменик директорот на Агенцијата за странски инвестиции и поттикнување на извозот, Христијан Делев.