06.06.2012, 13:50 Прокопиев ги промовираше „Антиупатствата за лична употреба“
Изборот на текстовите на Прокопиев чиј дел излегуваа во „Нова Македонија“, го направи амбасадорот на Хрватска во Македонија, Златко Крамариќ
„Антиупатствата за лична употреба“ на писателот Александар Прокопиев, како што самиот ќе каже, се налик на кусометражни аматерски филмови. По две објавени книги, во 2001 и 2009 година, денеска македонскиот автор во кафулето „Капри“ го промовираше својот „континуиран доживотен проект“ кој започнал да го работи уште од 1979 година.
Всушност, неговите текстови што излегуваа на страниците на весникот „Нова Македонија“, во додатокот за култура „Лик“, сега се во форма на книга чиј избор го направи амбасадорот на Хрватска во Македонија, Златко Крамариќ. „Антиупатства за лична употреба“ веќе излезе од печат, во издание на НИК „Нова принт“, а во сабота книгата ќе биде дистрибуирана како подарок заедно со весникот „Нова Македонија“.
„Кога ти е во глава, приказната е прекрасна, кога ја кажуваш, веќе е малку полоша, а кога ќе седнеш и ќе почнеш (премногу) да мислиш како да ја запишеш, станува банална“, вели Прокопиев за процесот на пишување на „Антиупатствата...“. „Можеби антиупатствата во почетокот беа такви: пред триесеттина години, кога навистина ги запишував за ’лична употреба‘, во амбиент што сосема прилегаше на намената - во една планинска касарна каде што ги отслужував осумте месеци војничка обука“, додава тој.
Од намножените текстови на Прокопиев создавани во изминативе три децении, е направен избор од амбасадорот Златко Крамариќ, кој е универзитетски професор по литература и провокативен колумнист, со повеќе од десет објавени книги зад себе.
„Прокопиев нема ништо против идејата нашиот секојдневен живот да биде уреден со ’упатства‘. Но, затоа што тој сепак, на никаков начин, не му припаѓа на естаблишментот, освен на оној интелектуален, тој се одлучи на своите верни читатели да им понуди одредена количество антиупатства“, вели Крамариќ во предговорот на книгата. „Нема сомнение дека се работи за автор за кој литературата е единствено искуство на светот и најубавите страници во неговите антиупатства се токму оние што се реферираат на неговиот однос кон литературата, кон Крлежа, Кадаре, Албахари, Маркес, Чехов, Ман, Џојс, Памук, Еко, Павиќ, Виктор Цар Емин, Борхес, Милош, постмодерна, стрип, Алан Форд...“ (Т.И.)
|
