Ѓоковиќ и Федерер со пресврт до полуфинале

Првиот и третиот носител утре еден против друг за финалето на Ролан Гарос

Новак Ѓоковиќ се пласира во полуфиналето на Ролан Гарос, победувајќи го Жо-Вилфред Цонга со 6:1,5:7, 5:7, 7:6, 6:1. Во маратонскиот меч на тенискиот стадион „Филип Шатрие“ публиката постојано беше на нозе, поддржувајќи го својот француски миленик на теренот. Сепак, на крајот мораше да го поздрави и најдобриот на АТП-листата.

„Ни сам не знам како успеав да се извадам од сево ова и да победам. Цонга беше подобар од мене, морам да признам, навивачите беа со него, беше исклучително агресивен и ми беше тешко да ја задржам концентрацијата. Во ваквите дуели некој мора да загуби. Жал ми е за Цонга, искрено“, ијзави по мечот Ѓоковиќ.

Тој уште еднаш го покажа она што му ја донесе лидерската позиција минатата година - неверојатна смиреност во најтешките моменти. По очајниот прв сет, Французинот одигра беспрекорно во следните три и се наоѓаше на чекор до голема победа над првиот светски рекет. Цонга имаше и четири меч-топки во четвртиот сет, но откако не ги искористи, го загуби тај-брејкот и му овозможи на Ѓоковиќ со фуриозна игра во решавачкиот петти сет да стигне до полуфиналето.

„Навистина е неверојатно тоа што ми се случи против Ѓоковиќ. Можев да го добијам. Обично, кога имам меч-топка, не знам за пораз. Овој пат имав четири можности во четвртиот сет. Имам за што да жалам. Одиграв речиси перфектен меч против првиот носител, а, сепак, не успеав да стигнам до победата“, изјави Цонга.

Следен на патот на Србинот ќе му се испречи Швајцарецот Роже Федерер, кој исто така имаше свој ден, совладувајќи го Хуан Мартин Дел Потро со 3:6, 6:7, 6:2, 6:0, 6:3. Швајцарецот се врати во игра по загубените два сета, ја зачува психолошката стабилност, а ја искористи и повредата на која се пожали Аргентинецот за време на мечот.