05.06.2012, 20:24 Надежите и дадоа пет гола на Данска и - загубија!
Младата репрезентација на Македонија загуби од Данска со 6:5 во квалификациите за ЕП 2013
Македонската млада фудбалска репрезентација загуби во денешната голеада во Алборг против Данска. На "Нордиска арена" публиката имаше можност да поздрави неверојатни 11 гола во квалификацискиот меч за Европското првенство во 2013 година во Израел, но и, за наша жал, победа на домашната селекција. Конечни 6:5 за Данците кои со овие три бода се вратија на втората позиција во групата со два бода повеќе и меч помалку.
Составот на Бабунски имаше лош вовед во средбата и по само 20 минути имаше негатива од 0:3, а на одмор се замина со минус четири (1:5). Но, сликата во мечот комплетно се смени во продолжението, барем кога се головите во прашање. Второто полувреме го добивме со убедливи 4:1 што на крајот, сепак, не беше доволно за обезбедување на континуитет на низата од 16 меча без пораз.
До крајот на квалификациите Македонија треба да одигра уште два меча, обата како гости, најпрво кај Северна Ирска и во последното коло кај Србија.
Данска - Македонија
Полувреме: 5:1. Стадион: "Нордиска арена" во Алборг. Гледачи: 2.000. Гл. судија: Боби Мејден. Помошници: Вилијам Конквер и Грем Лесли (сите тројца од Шкотска). Ж. картони: Слот - Данска; Гачевски, Брдаревски, Мециновиќ, Таири, Урдинов, Спировски - Македонија. Стрелци: Албек во 6 мин., Кристијансен во 19, 37 мин., Свјатченко во 25 мин., Хелениус во 45 мин., Е. Ларсен во 55 мин. - Данска; Спировски 26 мин., Несторовски во 65 мин., Богдановиќ во 68 мин., Таири во 83 мин., Фазли во 88 мин. - Македонија.
Данска: Ларсен, Гунделах, Свјатченко, Вестергард, Киркешков, Слот (Бех), Е. Ларсен, Албек, Хелениус (Макиенок), Кристијансен, Лаудруп. Селектор: Мортен Вегхорст.
Македонија: Гачевски, Брдаревски, Урдинов, Богдановиќ, Мециновиќ (Ристевски), Фазли, Несторовски, Хасани, Станков (Таири), Бабунски (Хусмани), Спировски. Селектор: Бобан Бабунски. (С.Д.)
|
