06.06.2012, 13:35 Поддршка од Финска за влез на Македонија за ЕУ
Финскиот претседател Саули Ниинисто денеска во Хелсински се сретна со премиерот Никола Груевски
Финска дава поддршка на проширувањето и вклучувањето на Македонија во Европската унија, истакнал финскиот претседател Саули Ниинисто на денешната средба во Хелсински со премиерот Никола Груевски
Според Груевски, на средбата со Ниинисто, кој е избран на функцијата пред околу еден месец, станало збор за билатералните односи, аспирациите на Македонија за членство во ЕУ и во НАТО и за спорот за името кој ги попречува овие процеси.
„Она што го потенциравме беше дека предолг период веќе Македонија има заслужено и е подготвена за членство во ЕУ и дека неправедно е оставена и понатаму да чека поради противењето на Грција и блокадите што таа ни ги прави. Ги изнесов сите детали околу тоа дека уште од 2009 година имаме добиено позитивно мислење и препорака за почеток на преговорите од Европската комисија и дека три години по ред, практично, се одложува почетокот на преговорите поради противењето на Грција, кое е неразумно и неразбирливо и не е во европски дух“, изјави македонскиот премиер.
Тој се осврнал и на состојбата со нашето членство во НАТО за што земјата од 2008 година е подготвена. Потенцирал и дека во декември минатата година Македонија го доби судскиот спор пред Меѓународниот суд на правдата во Хаг, како и дека се надева оти по изборите во Грција работите ќе тргнат во една подобра насока. „Останува да видиме што ќе се случи таму“, рече Груевски.
Главната цел за посетата на Хелсинки е претставување на инвестициските можности што ги нуди Македонија во однос на правење бизнис, ниските трошоци и даноци и сите други предности што земјата им ги нуди на инвеститорите. По средбата со претседателот Ниинисто, премиерот Груевски можностите за инвестирање во земјава ќе ги претстави и пред финските бизнисмени.
|
