(ФОТО) Учениците фрлаа стари книги и тетратки за поздрава животна средина



Денеска граѓаните собираа стара хартија како дел од еднодневната акција организирана од „Ајде Македонија“ и МПМ

Деспина Трајковска

Стари сликовници, учебници, испишани тетратки и стари списанија беа само дел од старата хартија што денеска беше собрана во над 100 пункта ширум државава како дел од акцијата „Ослободи се! Однеси ја старата хартија во училишниот двор!“. Акцијата ја организираше асоцијацијата „Ајде Македонија“ со медиумска поддршка на „Медија Принт Македонија“. Во акцијата реализирана по повод 5 јуни, Светскиот ден на животната средина, се вклучија стотици ученици од 16 училишта од Скопје, но и од другите градови.

Од старата хартија се ослободија и повозрасни граѓани, свесни, како што рекоа дека селекцијата на хартијата е неопходна оти процесот на рециклирање е од голема важност за зачувување на здравата животна средина. Токму тоа беше и една од причините за организираното собирање на старата хартија кое имаше за цел и подигнување на свеста, пред се' кај младата популација од потребата за селекција на отпад.

„Имав испишано повеќе тетратки, а бидејќи се ближи крајот на учебната година решив да ги фрлам. Истовремено се ослободив од отпадот и помогнав за зачувување на животната средина“, констатираше еден седмооделенец од Карпош.

„Токму вакви размислувања и однос кон старата хартија е и целта на нашата акција“, коментираа од „Ајде Македонија“ кои организираа и дебата „Модерни носачи на информации-Новите технологии во функција на почиста животна средина“. Целта на учесниците на дебатата беше да се согледаат предностите и мааните на користењето на интернетот наспроти хартија. Дискутантите генерално оценија дека не може да се заклучи дали за животната средина е подобро да се користат печатени материјали, или, пак, електронски помагала.

„На пример, за да се отпечати ‘Хари Потер‘ било потребно да се исечат околу 6 милиони дрвја. Од друга страна, имајќи во предвид дека од ден на ден технологијата осовременува, па имаме потреба од менување на делови или цел компјутер, ние сме принудени да создаваме отпад кога се ослободуваме од апаратот. Значи, се' е оставено на свеста на корисниците кои треба да заклучат дали во одредена ситуација е поздраво за околината да се користи хартија или интернет“, заклучи Петар Ивановски од „Биди зелен“.

Дека не може да се подвлече линија и констатира што е поздраво за животната средина, дали да се корис��и интернет технологијата или хартијата, убеден е и Жан Ив Лавоар, директор на Францускиот институт каде се одржа дебатата. Според него, користењето на интернетот не е секогаш синоним за заштита на животната средина, но, и обратно.

Инаку, до крајот на неделава организаторите очекуваат да ги сумираат резултатите од акцијата, а помагателот МПМ училиштата ќе ги награди со најнови литературни дела.