Британските режисери Тони Палмер и Мајк Сарн во филмот „Соба со пијано“

На 4 јуни на Скопски саем ќе почне снимањето на новиот филм на Игор Иванов, кој собра многу интересна интернационална екипа

Со британските режисери Тони Палмер и Мајк Сарн, кои влегуваат во филмот „Соба со пијано“ на Игор Иванов како актери, целосно се комплетира екипата на овој нов македонски филм, чиј старт на снимањето е закажан за 4 јуни. По германските актери Торстен Вогес и Ханес Вегенер, како и големиот српски и поранешен југословенски актер Светозар Цветковиќ, во филмот на Иванов влегоа и двајца многу реномирани режисери, кои ќе ја надополнат неговата актерска екипа.

Тони Палмер (1941) има огромен опус зад себе, кој вклучува над стотина филмски наслови. Тој се смета за еден од водечките режисери на музички документарни и историски филмови, во чие портфолио се остварувањата за многу музички легенди и за нивните дела, како што се „Битлси“, Џими Хендрикс, Френк Запа или делата на Стравински, Вагнер, Марија Калас, Леонард Коен. Палмер има освоено повеќе од 40 награди, има повеќе номинации и награди за БАФТА и ЕМИ, а познат е и како режисер на театарски претстави и опери.

Мајк Сарн (1939), пак, и' припаѓа на пионерската генерација филмски уметници од Велика Британија, кој многу успешно се занимавал со режија, но има и големо актерско искуство и соработувано со култни автори, како што се Јежи Сколимовски или Дејвид Кроненберг. Сарн бил номиниран за „Златен глобус“ за странски филм за неговото остварување „Јоана“ во 1969 година, а има значително искуство и успеси и на полето на поп-музиката.

Филмот „Соба со пијано“ собра доста интересна актерска екипа, која доаѓа од различни страни на светот. Во него играат и македонските актери Владо Јовановски и Наташа Петровиќ, како и: Ива Крајнц од Словенија, Јагода Кумриќ од Хрватска и Невена Ристиќ од Србија, а кон екипата се приклучи и светски познатиот пијанист Чили Гонзалес. Филмот е планирано да почне да се снима на 4 јуни, а целото снимање ќе се одвива во Скопје. (С.У.)