Мислења

Груевски во Финска

Гордан Георгиев

Опозицијата се' помалку се занимава со ДПМНЕ и се фокусира на нудење решенија за економската криза

ОЧИ ШИРУМ ОТВОРЕНИ

Се сеќавате на стариот добар виц „Ленин во Финска“? Приближно оди вака. На некоја изложба се појавила слика на која лежат во кревет голи маж и жена. Насловот на сликата бил „Ленин во Финска“. Кога некој од посетителите на изложбата препознал дека жената на сликата, всушност, е Надежда Крупска, сопругата на Ленин, а голиот маж на сликата не е Ленин, го прашал сликарот: Чекајте, а каде е Ленин? Одговорот бил: Па, Ленин е во Финска, оттаму и насловот на сликата.

Вицот за Ленин во Финска го употребувам како метафора за обезглавеноста на политиката на Владата на нашиот премиер Никола Груевски. Просто е неверојатно со каква леснотија Никола Груевски си дозволува да пропаѓа државата во која тој е премиер, а патем си ги тера своите каприци со невидена ревносност.

Се сеќавате дека неколку месеци пред Самитот на НАТО во Чикаго, кога на сите ни беше јасно дека Македонија нема да влезе во Алијансата, Груевски, Иванов, Арифи, Поповски правеа огромни турнеи низ Европа и светот обидувајќи се да ја истераат нашата кауза и да им кажат на државниците од НАТО-членките дека на Македонија и' се врши неправда. Се сеќавате и дека сите не' поддржаа во тоа, ги прифатија нашите аргументи, но редовно последната реченица им беше нешто во стилот „Не очекувајте да влезете во НАТО на овој самит“. Дури и Турција, која толку оптимистички навестуваше некакво чудо за нас во Чикаго, очекувано остана на принципот на солидарност помеѓу НАТО-членките. Ај што потроши Владата едно чудо пари за патувања, ај што ги лажеа граѓаните со некаков лажен активитет (демек, дипломатски офанзиви правеле), туку направија и подолгорочни штети за нашиот углед надвор. Јас сум убеден дека патогеното интервју на Груевски дадено за МИА беше напишано уште пред многу месеци, можеби не буквално, но убеден сум дека Груевск�� целата оваа „дипломатска офанзива“ ја правеше само за да „закуца“ со интервјуто. И навистина, премиерот „закуца“ за домашната неосвестена јавност, но со тоа ги „закуца“ и перспективите на државата.

Денес гледаме дека Груевски е во Финска, утре во Данска, задутре којзнае каде. Видовме и дека Веле Самак не сака да ни каже колку чинат овие роуд шоуа на Владата, демек сумата не можела да се спореди со бенефитот што го носат потенцијалните инвеститори. Ни кажа уште и дека опозицијата немала поим од странски инвестиции и дека не можело да се очекува во истиот момент странските инвестиции да се одразат на БДП, туку морало да се почека една, две, три години. А да прашам, колку години Веле Самак е министер во Владата на Груевски? Четири, пет, шест? А каде се странските инвестиции кои ќе се одразат на БДП од пред шест, пет, четири години? Па кого вие правите луди?

Наместо Самак да изигрува слеп хистрион на Груевски, еве му совет од опозицијата како се носат странски инвестиции: објаснете му на премиерот дека без НАТО нема посериозно придвижување на странските инвестиции. А ако веќе одлучил да не не' ��несува во НАТО, тогаш кажете му дека се' додека Стејт департментот, Амнести интернешенел, Фридом хаус и останатите меѓународни организации не' рангираат како полудемократска држава, еф ди ајс нема да има, господине Самак. Прашајте го премиерот дали знае што е риск асесмент? И дали некоја голема компанија ќе ви влезе во Македонија пред да ја праша својата влада околу политичко-безбедносната состојба во Македонија, околу сигурноста на капиталот и функционирањето на судството и администрацијата? Исто така, објаснете ни како е можно сите држави од соседството (биле - не биле членки на НАТО или ЕУ) да имаат повеќе инвестиции од Македонија?

Не, Груевски не оди во Финска по странски инвестиции. Тој оди таму за да даде изјава како Грците се лоши и колку мачнина има тој од тоа. Тој од Финска ја критикува опозицијата и сите оние што му пречат. А додека тој е во Финска и по разни „фински“, во Македонија неговите послушници, функционери, рекетари и сецикеси копулираат со нивната омилена љубовница: македонскиот народ. Додека нашиот Ленин се прави Финец, владините функционери обилно инвестираат во девастирање на сето она што остана вредно во Македонија. Покритието за ваквата „дозвола за уништување на иднината“ ја бараат во минатото. И во опозицијата која, ете, била полоша. Ама, опозицијата е се' подобра, покажуваат бројките. Опозицијата се' помалку се занимава со ДПМНЕ и се' повеќе се фокусира на нудење решенија за постојната тешка економска и социјална положба на граѓаните. Опозицијата влегува во градовите и во селата низ Македонија, промовира кандидати за градоначалници и нуди позитивни промени. Ете за почеток, може ли некој да негира дека Зоран Заев е еден од најдобрите градоначалници што ги имала независна Македонија? Или дека бившиот и, по мое длабоко убедување, идниот градоначалник на Велес, Аце Коцевски, е еден од најуспешните политички менаџери во историјата на градот? Нека оди Владата во Финска, ние сме тука, во Македонија и за Македонија.

(Авторот е потпретседател на СДСМ)

Наш став



Објавувањето колумни и мислења од надворешни автори е одраз на намерата на „Утрински весник“ да биде влијателен глас на заедницата. Но, напоменуваме дека не се согласуваме секогаш со ставовите што ги изнесуваат нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на други личности од која било сфера. „Утрински весник“ се оградува од таквиот речник и конотации и ги смета за непримерни во јавната комуникација.