Бошкоски ќе продаде нива во Челопек за да им плати на адвокатите

По осум месеци минати во притвор, Љубе Бошкоски прв пат разговарал
со сопругата без да бидат одвоени со стакло

Љубиша Станковиќ



Пред нешто повеќе од еден месец лидерот на Обе��инети за Македонија, Љубе Бошкоски, а на негово барање, е префрлен од затворот „Скопје“ во Казнено-поправната установа „Идризово“. Токму овој „трансфер“ му овозможи на Бошкоски да оствари непосредна средба со неговата сопруга и со неа да поразговара за се' што е заинтересиран.

„Поради измени во законот, минатата сабота, остварив средба со Љубе. Ова беше моја прва посета, по осум месеци минати во притвор, на која не разговарав со него-преку стакло! Кога ме виде се израдува. Разговаравме за многу работи, а откако си заминав, како што ми беше пренесено, му било многу тешко. Ме изненади тоа што е информиран за многу работи, а покажа особен интерес за семејството и партијата. Уште е онаков каков што беше за време на судењето“, раскажува сопругата на Љубе, Виолета Бошкоска.

Од разговорот што го имала со Љубе, неговата сопруга заклучила дека тој е во тек со се' она што се случува со членовите и приврзаниците на ОМ. Токму од него таа разбрала за одредени притисоци кои членови на ОМ ги имале во Македонски Брод и во Крива Паланка, но и тоа дека член на неговата партија од Струмица неодамна добил азил во Шведска.

„Тој знае дека има сили кои сакаат да ја уништат Обединети за Македонија и дека многу скоро, најверојатно по одлуката на Апелацискиот суд, тој повторно ќе биде на удар“, раскажува Виолета Бошкоска. Таа вели дека Љубе, за разлика од затворот во „Шутка“, сега е во просторија во која има греење.

„Сега му било подобро. Ми кажа дека во собата се осуммина и дека собата изгледа како да е од 18-ти век, но дека во неа има греење. Во негов стил, Љубе ми вели дека освен греење, има и редовни оброци и токму поради тоа му било жал за сите граѓани кои се ’надвор’, бидејќи најголемиот дел од народот ниту има греење, ниту редовна исхрана. Се пошегува и ми рече дека сега по цел ден гледа телевизиски серии и вести“, раскажува Виолета Бошкоска и објаснува дека на нејзината прва тет-а-тет средба со сопругот се разговарало и за семејството.

„Тој е загрижен за децата, но многу му е мило што ќерката му испратила подарок. Вели дека подарокот не сакал да го стави на себе и дека по цел ден го држел в раце и го милувал. Се договоривме да продадеме една нива во Челопек за да можеме колку-толку да им надоместиме на адвокатите“, раскажува Бошкоска и вели дека тој дури сега станува свесен за некои работи.

„Смачено му е од многу работи. И тој имал поднесено некаква тужба и сега решил да ја повлече. Вели дека му е мачно и дека иако е тужител не сака да го носат со ’лисици’ по судовите. Рече дека не може да поверува дека имало толку многу луѓе кои само сакаат да нанесуваат зло или да се одмаздуваат. И додека јас го советувам да си го чува здравјето и да не дозволи да биде уништен, Љубе ми вели дека повторно ќе му покаже на македонскиот народ дека е неправедно осуден“, вели Виолета Бошкоска.