15.08.2012, 15:02 Британија прва ја напуштa ЕУ
Белгискиот портал на англиски јазик ЕУ Обзервер денеска предупреди дека само 46 отсто Британци би биле против напуштањето на ЕУ
Велика Британија, а не Грција може да биде првата држава која ќе ја напушти ЕУ, предупредува денеска белгискиот портал на англиски јазик ЕУ Обзервер.
Во аналитички текст порталот се повикува на истражување на јавно мислење кое покажува дека 46 отсто Британци гласале против останување во ЕУ додека мал број сметаат дека таа островска држава имала повеќе штета отколку корист од досегашното членство. Освен тоа, 80 отсто анкетирани одлучно се против напуштање на фунтата и влез во еврозоната.
ЕУ Обзервер укажува дека поради променети политички околности растат и шансите во блиско време да се распише референдум кој би резултирал најверојатно со излегување од ЕУ.
Порталот потсетува дека британскиот премиер Дејвид Камерон за време на изборната кампања ветувал дека ќе распише референдум за останување во Унијата, но по изборите се откажал од таа идеја.
Меѓутоа должничката криза во ЕУ како и навестувањата дека може да се дојде до воспоставување фискална унија и давање на Брисел поголеми овластувања над економиите на државите-членки, ја зајакнал антиевропската струја во Конзервативната партија на Камерон.
ЕУ Обзервер се повикува на уште една анкета по која голем број конзервативци би сакале да раскинат коалиција со проевропските Либерални демократи и да се здружат со Партијата за независност која се залага за целосно разидување на Лондон и Брисел. Партијата за независност која ја предводи Најџел Фараж до скоро беше маргинална, но анкетите укажуваат дека на следните избори може да се изедначи по број на гласови со либералите, наведува ЕУ Обзервер.
Во Брисел има се помалку разбирање за упорните барања на Лондон да добие исклучок од темелните заеднички стандарди во социјалната политика и заштитата на човековите права.
- Расте интенцијата за распишување референдум, тврди ЕУ Обзервер со констатација дека односот на Британија и ЕУ се повеќе потсетува на наметнат брак во кој двете страни се длабоко несреќни
|
