Груевски: „Едно развеселено лице и еден тажен човек“

„Прегратката“ меѓу Црвенковски и Груевски беше пиштолот што го означи стартот на една жестока кампања за оцрнување на противникот.

Премиерот Никола Груевски вчера најавеното сојузништво го оцени како една слика илјада збора. „Погледнете ја сликата и не знам дали има нешто да се коментира. Јас утрово погледнав една слика во еден дневен весник каде што се сликале заедно, очигледно тоа била специјална фотосесија во која гледаме едно поразвеселено лице и еден тажен човек. Кај развеселениот има некоја надеж дека ова ќе го врати во политиката, бидејќи е исфрлен пред повеќе години. Тажниот мислам дека на некој начин е свесен оти ова нема да му помогне да не ја заврши катастрофално својата кариера иако прави очајнички обид да го спречи тоа“, изјави Груевски

Од Прилеп, пак, вицепремиерот Зоран Ставревски порача дека со средбата меѓу Црвенковски и Георгиевски почнува падот на една политика што тие ја застапувале во изминатите 20 години.

„Се случи промовирање на една природна коалиција, помеѓу двајца кои имаат исти вредности и ист морал. И не е ни чудо што никој посебно не се изненади од вчерашниот настан. Тие двајца природно си припаѓаат еден со друг. Убедени сме дека нема човек во државава на кого од оваа коалиција не му се превртува стомакот“, вели Ставревски.

На Ставревски промптно му вратија од ВМРО-Народна: „Кога сме кај превртување на цревата, благодарение на овој човек на најголемиот дел од народот му се превртуваат цревата од глад. Токму тој Ставревски во време на владеењето на СДСМ, од осамостојувањето па до 1998 година, односно два мандата, беше помошник на министерот за финансии. И по доаѓањето на ВМРО-ДПМНЕ на власт, Зоран Ставревски остана на функцијата помошник-министер за финансии“, потсетија од ВМРО-НП.

Приказна за цревата Црвенковски ја зачини со изгорени ќесиња: „Ставревски нека го праша кумот Груевски зошто четири години седеше во неговата влада како млада невеста и зошто потпишуваше се' што ќе му кажеа и за приватизациите, и за стечаите и за отпуштените работници. Мојата препорака до нив, до кумот Груевски и до кумашинот Ставревски е ’со вас куме на власт, на граѓаните им изгоре ќесето’“, поентираше Црвенковски.

Ваквите препукувања, навистина, се' уште ја немаат силата да му ја одземат историската димензија на дуелот меѓу Црвенковски и Георгиевски спроти претседателските избори 1999 година, кој ја остави без здив јавноста и ја означи кулминацијата на затегнатите односи меѓу ВМРО-ДПМНЕ и СДСМ. (Н.К.)