Опозицијата му го расипа мирот на Вељаноски

Претседателот на Собранието се жали на поплава од закони поднесени од опозициските пратеници. Тие пак, тврдат дека тоа е во интерес на граѓаните

Даниела Трпчевска


Опозицијата не доаѓа на координација, но предизвика поплава од закони, со кои се троши времето, но и финасиските средства со кои кубури собранискиот Буџет, се пожали вчера шефот на парламентот Трајко Вељаноски. Собранието, тврди тој, екстензивно работи, се трошат ресурсите, но и пратениците се исцрпено со постојаните расправи и седници.

„Не доаѓаат на координација, а законите во меѓувреме поминуваат. Многу работиме, но тоа е наметнато и од страна на опозицијата, со едно стампедо на закони кои се поднесуваат. Имаме над 40 закони од опозицијата кои се поднесени и е расправано по нив. Трошиме време, ресурси, но и финасиски средства, а некои од пратениците поднесуваат исти закони по неколку пати. Повеќе ќе се истрошиме како пратеници и се трошат финансиски средства, кои во услови на криза влијаат и врз работењето на Собранието“, вели Вељаноски.

Според координаторот на пратеничката група на СДСМ, Игор Ивановски предлагањето закони е уставно и политичко право, а најмногу е обврска кон граѓаните кога станува збор за заштита на нивните интереси. „Ние тоа го правиме и ќе го правиме и понатаму и целосно ќе ја исполнуваме нашаат должност кон граѓаните и државата“, додава тој.

Како резултат на зголемата активност на парламентот, според првиот човек на законодавниот дом, се таложат и долговите и кон надворешните служби, но и кон самите пратеници, на кои се порешко ќе им се исплаќаат патните трошоци.

Покрај долговите кон владината Служба за заеднички работи, согласно динамиката на Буџетот, Собранието создава долгови и кон пратениците. „Лани им должевме за четири месеци исплата на патните трошоци. Од почетокот на годинава се исплатени речиси сите патни трошоци. Но, со ребалансот на Буџетот, се намалени средствата за собраниските трошоци. Можно е со зголемата динамика на работа, дури и до осум месеци да доцни исплатата на трошоците за пратениците до крајот на годината“, вели Вељановски.

Но, според опозицијата вината за големите трошоци треба да се лоцира на друго место. „Што се однесува до неразумното и расипничко трошење на пари, вистинската адреса за тоа е Владата, која што покрај тоа што крати од лебот на граѓаните и парите на фирмите, скрати и од Собранието, само за да гради споменици. Бидејќи граѓаните се во голема сиромаштија, Вељаноски требаше да се откаже од градењето на куполите во Собранието или пак да ги прибере неговите 71 пратеници, кои ја поддржуваат Владата, да работат на собраниските места, бидејќи присуствуваат не повеќе од педесетмина“, коментира Игор Ивановски од СДСМ.

Првиот човек на парламентот ја критикува опозицијата дека ги бојкотира договорите за работа. Но, овој пат, според него, не станува збор за класичен бојкот, туку „додека едните ја бојкотираат координацијата, другите доаѓаат на средбите, но постојано бараат паузи, кочејќи ја работата“.

Но, пратеникот на СДСМ Игор Ивановски, пак, тврди дека опозицијата е всушност единствената која што го почитува Собранието како законодавен дом. „Неприсуството на координацијата не е бојкот на Собранието, туку само на Вељаноски, кој избра да биде само обичен партиски војник, а не претседател на најважната институција во државата“, вели Ивановски.

Покрај застојот во координацијата, во Собранието не може да помине ниту етичкиот кодекс за пратениците, кој го предложи Вељаноски, но не може да биде усвоен додека не се усогласи со сите пратенички групи.

„По две–три работни средби има шанса да се донесе“, оптимист е Вељановски. Во однос на шпекулациите дека има проблеми со исплатата на средства за фирмите подизведувачи кои работат на изградба на новите собраниски куполи, Вељаноски вели дека нема такви сознанија. Сите фактури околу изградбата на собраниските куполи се исплатени на фирмата која е задолжена за тоа, додава тој. (Д.Т.)