За лекување заби на одмор, Фондот не враќа пари
Фондот за здравствено осигурување повеќе не ги признава стоматолошките услуги како дел од двојазичната здравствена книшка за лекување во странство
Јасмина Јовановска
Ако ве заболи заб додека сте на одмор надвор од земјава и побарате стоматолошка помош, сами ќе си ги покриете трошоците. Фондот за здравствено осигурување од годинава не ги признава стоматолошките услуги направени за време на одмор дури и да имате извадено двојазична привремена книшка, што е гаранција дека кога ќе дојдете дома ќе си ги вратите парите потрошени за итните здравствени услуги. Затоа, годинава Фондот издава двојазични книшки и без потврда за здравствената состојба на забалото што ја издава матичен с��оматолог.
„Од годинава, комисијата што ги издава двојазичните здравствени книшки на годишноодморците не инсистира на потврда од матичен стоматолог, бидејќи не ги признава и стоматолошките услуги. Односно, ако те заболи заб и ако си бил на заболекар и си платил за интервенцијата, Фондот не враќа пари и ако имаш двојазична книшка“, објаснува портпаролот на Фондот за здравствено осигурување, Бранко Аџигогов.
„Една забоболка може да се лекува со таблети, а може и да се предвиди ако се расипе некој заб“, е објаснувањето зошто Фондот повеќе не покрива стоматолошки услуги додека граѓаните се на одмор.
Со непокривањето на стоматолошките услуги значи дека за да се добие гаранција од македонскиот Фонд за бесплатно лекување на ургентни состојби додека граѓаните се на одмор, треба да се обезбеди само по една потврда и тоа од матичен лекар за маж и матичен педијатар за деца. За жената и натаму останува дека освен од матичен лекар мора да има и потврда од матичен гинеколог. Иако овие потврди треба да се бесплатни, граѓаните се жалат дека матичните лекари им ги наплатуваат од 100 до 250 денари.
„Како може за едно ливче што е само потврда дека сум здрава да ми се наплати 150 денари или, пак, 250“, се жали една пациентка. Таа вели дека ако вака сите и' бараат пари за потврдите, додека ги собере за целото семејство ќе потроши околу 1.000 денари. „Подобро ќе биде да извадам здравствено осигурување од осигурителните компании што чини 300 денари, наместо да се малтретирам и да чекам по чекалниците“, реагира една скопјанка, која за десетина дена ќе замине на одмор во Турција.
Од Фондот за здравствено осигурување се категорични дека матичните лекари никако не смеат да ги наплатуваат потврдите и ги советуваат граѓаните да ги пријават таквите случаи. „А, потврдите за здравствената состојба мора да се соберат, бидејќи Фондот мора да се заштити од евентуални злоупотреби“, вели портпаролот на ФЗО, Аџигогов.
Тоа значи дека треба да се спречи можноста пациентите по сопствена желба да се лекуваат во странство за услуги што ги има и во нашето јавно здравство.
Но, и покрај ваквото малтретирање на осигурениците, од Фондот велат дека интересот за овој вид здравствено осигурување не е мал, иако летувалците имаат можност да извадат и патничко здравствено осигурување преку осигурителните компании. Така, само за јуни и за јули и тоа само за Скопје се издадени 250 вакви обрасци. „Кога ќе видат дека патничкото осигурување не им важи за сите видови услуги и ако не дај боже им се случи нешто, треба да прашаат каде да се обратат за помош, граѓаните се' повеќе се одлучуваат за фондовските привремени здравствени книшки“, објаснува Аџигогов.
Во ФЗО велат дека привремената здравствена легитимација важи само доколку годишноодморците имаат потреба од итна медицинска интервенција. „Врз основа на двојазичниот образец се користат бесплатни здравствени услуги, односно осигуреното лице на ФЗО се изедначува со осигурените лица на земјата каде што престојува. Ова значи дека доколку осигурените лица на таа земја се обврзани да платат партиципација за здравствената услуга, тогаш и осигуреното лице на ФЗО е обврзано да плати само партиципација, а другите трошоци ги надоместува македонскиот Фонд“, објаснува директорот на Секторот за меѓународна соработка во ФЗО, Аритон Фида.
Но, и да нема двојазичен образец, ако за време на привремениот престој осигуреникот има потреба од итни и неопходни здравствени услуги, има право да поднесе барање за рефундација во подрачната служба на Фондот каде што живее. Доколку лекарската комисија ја потврди итноста, Фондот враќа 80 отсто од средствата.
Двојазичните книшки важат во 17 земји
Двојазичните привремени книшки, како што информираат од Фондот, важат во Франција, Унгарија, Италија, Австрија, Хрватска, Турција, Словенија, Србија, Црна Гора, Бугарија, Германија, Босна и Херцеговина, Чешка, Холандија, Романија, Луксембург и во Белгија.
Од Фондот велат дека напорите за воспоставување ваков вид соработка со Грција, која и натаму е најатрактивна земја за летување и годинава се безуспешни, бидејќи од другата страна нема многу интерес. Исто е и со Албанија, со која годинава се преговара и се превидува до ноември да се потпише договор за реципрочно лекување. Во сите други земји со кои не е потпишана конвенцијата пациентот сам си ги плаќа сите здравствени услуги. |
