ЗНМ се повлекува од Советот за радиодифузија
26.07.2011, 16:00
Здружението на новинари на Македонија (ЗНМ) денеска соопшти дека во иднина нема да делегира свои претставници во Советот за радиодифузија, а актуелните членови на Советот, предложени од ЗНМ, Бранислав Радовановиќ и Столе Наумов, ги повикува да го преиспитаат своето учество во работата на Советот.
Таквата одлука, која ја донел Управниот одбор на ЗНМ на вчерашната седница, според соопштението, е изнудена од начинот на кој Собранието на Република Македонија ги изгласа измените и дополнувањата на Законот за радиодифузија, со кои се зголеми бројот на членови на Советот од 9 на 15.
Здружението истакнува дека воопшто не било вклучено во процесот на донесување на Законот, со кој се уредува работата на електронските медиуми.
Здружението на новинарите (ЗНМ) и Самостојниот синдикат на новинарите и медиумски работници (ССНМ) преку заедничко соопштение изразија и жалење поради стечајната постапка за ТВ А1 што ја прогласи денеска скопскиот Основен суд 2, како и надеж дека таа нема да доведе до згаснување на телевизијата.
- Очекуваме дека сите надлежни инстанци кои решаваат за судбината на ТВ А1 ќе го споделат нашето уверување дека македонскиот медиумски простор би бил сериозно осиромашен со затворањето на најстарата приватна телевизија во Република Македонија. Особено загрижувачки е фактот што стечајната постапка би можела да доведе до губење на работа на голем број наши колеги, се вели во соопштението.
Од ССНМ посочуваат дека веќе се во комуникација со синдикалниот претставник на ТВ А1 и до своите членови доставиле образец за побарувања кои треба да се упатат до стечајниот управник во случај на прекин на работниот однос. Синдикатот на своите членови им нуди правен совет и помош за сите натамошни чекори
|
