Им престанува работниот однос на вработените од А1
26.07.2011, 14:34
Со отворањето на стечајната постапка за А1 телевизија, согласно Законот за стечај, им престанува работниот однос на сите, околу 230 вработени во телевизијата. Ова денеска го потврди и назначениот стечаен управник, Ацо Петров, откако Основниот суд Скопје 2 донесе решение за отворање на стечајна постапка за телевизијата.
Петров потврдува дека еден дел од вработените со одобрение на Судот ќе бидат задржани за одредени неодложни работи, но не сакаше да прејудицира колку, со оглед на тоа што Советот за радиодифузија треба да одлучи дали со отворањето на стечајната постапка, ќе и’ ја одземе на А1 дозволата за работа.
Од Советот за радиодифузија велат дека за ова ќе се произнесат утре, но Петров вели дека членот 62 од Законот за радиодифузија е дециден.
Членовите на Советот за радиодифузија, пак, имаа различни мислења за тоа дали со отворање на стечајната постапка ќе и’ се одземе дозволата за работа на телевизијата. Различно го толкуваа членот 62 од Законот за радиодифузија кој вели „Ако настапи стечај или ликвидација, дозволата за работа престанува да важи“.
|
