Опозицијата се остри пред изборот на владата
Од СДСМ и од партнерите зависи колку ќе трае собраниската расправа за третиот кабинет на Груевски
Александра М. Митевска
Од тактиката што ќе ја договори опозицијата зависи колку долго ќе трае собраниската седница за избор на новата влада, што ќе почне утре точно напладне. Ако пратеничките групи од левата страна во парламентарната сала рафално ги нападнат програмата и министрите што ги предложи мандатарот Никола Груевски, многу веројатно е расправата да се оддолжи до доцна во ноќта в четврток.
За владата мора да се гласа до задутре на полноќ, а за таа да биде избрана, потребни се најмалку 62 гласа. Веќе за в петок се најавува нова седница за избор на замениците-министри, со што ќе се комплетира вториот ешалон на извршната власт. Потоа новиот кабинет на стариот премиер ќе почне да ги троши првите сто дена, а пратениците ќе заминат на колективен одмор.
Во штабовите на опозициските партии се' уште се договараат насоките за настапот на нивните пратеници. Лидерот на СДСМ, Бранко Црвенковски, вчера ги собра на ручек партнерите од опозицискиот фронт. Со тоа тие манифестираа единство пред третото устоличување на Груевски на „Илинденска“, а наспроти шпекулациите дека некои пратеници од помалите опозициски партии ги затоплуваат релациите со владејачката партија.
Синоќа требаше да заседава Извршниот одбор на СДСМ, а денес ќе продолжи координацијата кај претседателот на Собранието, Трајко Вељаноски, која почна вчера, за да се допрецизира техниката според која ќе тече седницата.
Од пратеничката група на социјалдемократите вчера не сакаа да откријат детали за тоа како ќе настапат. Велат дека критиките што ги имаат за предложениот состав на владиниот кабинет и за програмата ќе ги соопштат директно од собраниската говорница.
Сепак, вчерашната координација во парламентот навести долга и бучна расправа пред гласањето за владата, бидејќи за дискусија веќе се пријавиле речиси сите пратеници од опозициските партии, иако до крај постои можност некои од нив да се повлечат. И атмосферата во која поминаа претходните две собраниски седници, на кои се верифицираше договорот Груевски - Али Ахмети, сигнализираше дека во наредниот период дијалогот власт - опозиција во законодавниот дом ќе се води на висок тон.
„Ќе ги изнесеме сите аргументи зашто сметаме дека оваа влада не заслужува поддршка. Сами нека си ја изберат владата, ние нема да им помогнеме во тоа “, коментира еден пратеник, најавувајќи дека опозицијата нема да биде воздржана и дека нејзините претставници ќе гласаат против предложениот владин состав.
Седницата ќе почне со експозето на Груевски, кој трет пат ќе побара мандат од пратениците да ја води извршната власт. Според собранискиот Деловник, обраќањето на мандатарот не смее да трае подолго од 15 минути, по што ќе почне расправата во која секој пријавен пратеник ќе може да дискутира најмногу 10 минути.
Во новиот кабинет на Груевски влегуваат петмина нови министри, а дел од досегашните ги сменија ресорите. Генерално, во владата што сега ќе се избере нема многу нови имиња, така што се очекува предмет на критика да бидат и минатиот труд на досегашните министри и биографиите на новите членови на кабинетот.
Копја, секако, ќе се кршат и за обемната програма што ја достави Груевски во парламентот, а која се базира на неколку столбови: развој на економијата и намалување на невработеноста, евроатлантска интеграција на Македонија, борбата против корупцијата и организираниот криминал, владеење на правото, реформи во судството и во администрацијата, развивање на меѓуетничките односи и имплементацијата на Рамковниот договор, инвестиции во образованието и науката...
Иако од ДУИ тврдат дека нивните сугестии биле земени предвид при пишувањето на владината програма, процените се дека и во овој мандат акцент ќе се стави на политиките на главната владејачка партија. Иако, со оглед на изборниот резултат, интегративците сега се во уште покомотна позиција, нивните клучни барања доживеаја реализација уште пред изборот на новата влада, со усвојување на законите со кои се проширува опсегот на употреба на албанските знаме и јазик, а инволвираните во хашките случаи добиваат амнестија. Сега е на ред ВМРО-ДПМНЕ. |
