Пет минути интервју
Изгрејсонце на плажа „Парк“
Кристијан Стефановски - менаџер, „План Б-продукција“
Катерина Шекеровска
Броиме ситно до „Самер скрим фестивал“, кој е закажан за 31 јули, на плажата „Парк“, во Охрид. Како течат подготовките?
„Подготовките се при крај. Како и сите концерти што сме ги организирале досега, така и за овој се надеваме дека се' ќе помине во најдобар ред и дека и публиката и изведувачите ќе бидат задоволни што присуствувале и учествувале на таков фестивал. Изведувачите се веќе добро познати: ’Ван Гог‘, ’Прљаво казалиште‘, ’Дивлје јагоде‘, ’Морал‘. Дали ќе има уште некоја поддршка од македонски бенд посетителите ќе видат на самото место“.
Кога почнува фештата, како ќе изгледа цела таа журка на песок?
„Фештата официјално ќе започне во 21 часот, а ќе трае до раните утрински часови. Можеби навидум фестивалот изгледа ист како во Скопје поради изведувачите, но гарантираме дека ќе биде многу, многу поразличен. Прво, бидејќи сите изведувачи имаа поголемо времетраење на нивните настапи, на пример, „Казалиште“ во Скопје свиреше еден час и многу хитови не беа отсвирени, додека во Охрид нивниот настап ќе биде 110 мин. Настанот е различен по самото тоа што чувството е поинакво на лето, покрај вода на плажа. Мислам дека сите заедно ќе го дочекаме изгрејсонцето“.
Тешко ли е да се организира еден ваков музички хепенинг?
„Видете, ова, пред се', е многу стресна работа. Можеби навидум отстрана кога некој го гледа сето ова изгледа многу лесно и едноставно. Секоја организација на голем фестивал концерт, настан е многу напорна, треба многу нерви, пред се', финансии, спонзори... Инаку, десет дена пред концертите сум секогаш во Охрид за да видам дали се' тече според планот“.
Првиот дел од годинава беше многу напорен за „План Б“ - Евровизија, нови ексклузивци, концерти... Кога на одмор?
„Мене и на целиот тим на ’План Б-продукција‘ ни е задоволство зашто од година на година стануваме се' поуспешни во нашата работа и заедно растеме. Сето тоа го правиме благодарение на македонската публика, на новинарите и на Господ. Мислам дека со постоењето на ’План Б-продукција‘ на македонската сцена се сменија многу работи и луѓето од истата бранша сфатија дека се' мора да се работи професионално.
Одмор, секако, ќе има, но по концертите. Имам неколку дестинации на ум, најверојатно, ќе биде Латинска Америка, Барбадос, Мексико... ќе видиме каде точно... Се' уште немам одлучено со кого ќе одам на одмор, бидејќи моментално немам блиско женско лице до мене...“ |
