Собарката прозбори за Строс-Кан
Имигрантката од Гвинеја, Нафисатоу Дијало, изјави дека сака „тој да оди во затвор“
Собарката од хотелот во Њујорк, која го обвини поранешниот прв човек на ММФ, Доминик Строс-Кан за обид за силување во хотелскиот апартман, го даде своето прво интервју. Нафисатоу Дијало за магазинот „Њусвик“ изјави дека ја зборувала вистината за инцидентот што се случи на 14 мај. Потегот дојде откако властите размислуваат за тоа дали да ги отфрлат обвиненијата против него во услови на сомневања околу нејзиниот кредибилитет.
Францускиот политичар (62), кој поднесе оставка на функцијата претседател на ММФ за да се брани себеси, жестоко ги отфрли сите обвиненија. Тој наведе дека она што се случило со Дијало било со обострана согласност, а неговите адвокати го опишаа интервјуто на собарката како „несоодветно“.
Дијало за магазинот „Њусвик“ изјави: „Сакам тој да оди в затвор. Сакам да знае дека има некои места каде што не може да се користи моќта, не може да се користат парите“.
Триесет и двегодишната имигрантка од Гвинеја за магазинот кажа дека била исплашена дека ќе ја загуби работата кога на крајот избегала од собата каде што се случил наводниот инцидент. Но, претставниците на Строс-Кан ја обвинија за водење „медиумска кампања“ за убедување на обвинителите за продолжување на обвинијата против поранешниот човек на ММФ, објави новинската агенција Ројтерс.
Тој е обвинет по седум точки, вклучувајќи и четири обвиненија за посериозни кривични дела - две за кривични полови дејства, еден за обид за силување и еден за сексуално злоупотребување - плус три помали прекршоци, вклучувајќи и незаконско затворање.
Но, во некои американски медиуми се наведува дека случајот е пред колапс. Обвинителите наведоа дека собарката дала лажно сведочење пред големата порота, цитирајќи ги недоследностите во нејзината изјава за редоследот на настаните на тој ден.
Строс-Кан на 1 јули беше ослободен од домашниот притвор и му беа вратени кауцијата во готовина и обврзници во вредност од шест милиони долари. Во меѓувреме, француските власти ги истражуваат тврдењата дека Строс-Кан се обидел да ја силува француската авторка Кристин Банон пред една деценија. Строс-Кан негира дека направил такво нешто, и поведе контратужба прот Банон за давање лажни изјави.
Дијало, исто така, даде интервју и за мрежата Еј-Би-Си, од кое исечоците беа емитувани вчера. Се' додека таа не се согласи за интервју, нејзиното име не беше објавувано во медиумите, кои вообичаено ги штитат идентитетите на луѓето што велат дека биле сексуално нападнати. (Би-Би-Си) |
