СП во Шангај
Француска доминација на 100 грбно
26.07.2011, 15:12
На третиот натпреварувачки ден на Светското првенство во спортови на вода што се одржува во Шангај на пливачките дисциплини белег остави трката на 100 метри грбно кај мажите. Првото место го поделија двајца Французи, Камил Лакур и Жереми Стравиус кои патеката ја испливаа за 52.76 секунди. Бронзата му припадна на Јапонецот Риосуке Ирие.
На 200 метри слободно Американецот Рајан Лохте конечно излезе од „сенката“ на својот сонародник многу по познатиот Мајкл Фелпс. Лохте до златото стигна со време 1:44.44 оставајќи го Фелпс на второто место и светскиот првак од Рим 2009 Пол Бидерман од Германија на третото место.
Повеќекратната светска шампионка на 100 метри грбно Американката Натали Коглин беше во водство во поголемиот дел од трката, а освои само бронза, додека златниот медал го освои Јинг Жао од Кина, со време 59.05 секунди. Среброто со една стотинка заостанување и припадна на Русинката Анастасија Зуева.
На 1500 метри слободно во „соло“ трка Лоте Фрис од Данска, среброто од претходното СП го претвори во златниот медал со време 15:49.59, пред Американката Кејт Циглер и Ксуанксу Ли од Кина.
Американката Ребека Сони триумфираше на 100 метри градно со резултат 1:05.05, пред Лајзел Џонс од Австралија и Липинг Ји од Кина. зс/скс/14:35
|
