Мандатарот го предлага Павлески од САД за министер без ресор
26.07.2011, 14:51
Мандатарот за состав на новата Влада Никола Груевски денеска достави до Собранието дополнување на предложениот состав на владата со уште еден министер без ресор. Груевски на ова место го предлага Бил Павлески роден 1974 во Охрид, а живее во САД.
Седницата за избор на новата влада е закажана за утре. Според денеска договореното на координативната средба кај претседателот на Собранието Трајко Вељаноски, седницата почнува на пладне, на која мандатарот ќе има експозе во кое ќе ја образложи програмата и предлогот за состав на владата.
Никола Груевски, кој е шести премиер од независноста на Македонија, по третпат добива можност да формира влада, откако ВМРО-ДП��НЕ победи на изборите во 2011, 2008 и 2006 година.
Во новиот владин состав за вицепремиерските места од ВМРО-ДПМНЕ се предложени Зоран Ставрески и Владимир Пешевски. Гордана Јанкулоска останува министер за внатрешни работи, додека Министерството за култура и натаму ќе го води Елизабета Канческа-Милевска.
Никола Попоски, досегашниот амбасадор во ЕУ, ќе раководи со македонската дипломатија, Никола Тодоров ќе раководи со Министерството за здравство, а за нов министер за образование и наука од редовите на ВМРО-ДПМНЕ е предложен Панче Кралев. Министер за администрација и информатичко општество останува Иво Ивановски, како и Миле Јанакиески, кој ќе го води Министерството за транспорт и врски.
Министерството за земјоделство и во овој состав и припадна на Социјалистичката партија и ќе продолжи да го води Љупчо Димовски. Министер за труд и социјална политика ќе биде Спиро Ристески, кој досега беше заменик-министер во овој ресор.
Од редовите на коалицискиот партнер ДУИ има двајца вицепремиери - за европска интеграција е Теута Арифи, а за спроведување на Рамковниот договор - Муса Џафери. Валон Сарачини ќе го води ресорот економија, а досегашниот министер Фатмир Бесими преминува во Министерството за одбрана.
Екологија ќе ја води Абдулаќим Адеми, локалната самоуправа Невзат Бејта, а министер за правда ќе биде Блерим Беџети.
Министри без ресор остануваат Неждет Мустафа, Хади Незир и Веле Самак
|
