Брејвик: Нападите беа „грозоморни, но нужни“
Вчера напладне во Норвешка беше оддадена почит со едноминутно молчење во знак на сеќавање на жртвите на масовниот убиец
ОСЛО - Андерс Беринг Брејвик, човекот кој призна дека ги изведе петочните терористички напади во Норвешка, се појави вчера пред судот. Сослушувањето беше зад затворени врати, како што нареди судијата. Напладне беше одржано едноминутно молчење во знак на сеќавање на жртвите.
Брејвик (32) призна дека го извел бомбашкиот напад во главниот град Осло, подоцна и масакрот врз младинскиот камп на островот, убивајќи најмалку 93 лица вкупно. Брејвик, кој требаше да се појави пред судот во 13 часот, изјави дека ќе ги објасни своите постапки пред судот. Претходно тој ги опиша нападите како „грозоморни, но неопходни“.
Имаше ап��ли за медиумски мрак во однос на покривањето на судењето за да не му се даде на Брејвик платформа за изнесување на своите ставови. Според норвешкиот закон, ако биде обвинет, тој се соочува со максимална казна во времетраење од 21 година, иако таа казна може да биде продолжена ако затвореникот се смета за закана за општеството.
Полицијата соопшти дека иако осомничениот ги признал убиствата, тој не ја прифатил кривичната одговорност за нив. Неговиот адвокат Геир Липестад, во неделата за норвешките медиуми изјави: „Тој смета дека било грозно да се извршат вакви дела, но во неговата глава, тие биле неопходни“.
Вчера беше соопштено дека полубратот на престолонаследничката Мете Марик, Тронд Бернтсен, полицаец што не бил на должност, бил меѓу убиените во младинскиот камп. Тој беше син на очувот на Мете Марик, кој почина во 2008 година.
Во Франција полицијата го пребарува домот на таткото на Брејвик во Куранел на југот од земјата, иако не ја коментира операцијата. Се наведува дека Јенс Брејвик повеќе години не бил во контакт со својот син.
Телата на убиените на островот во неделата беа пренесени до мртовечница во Осло. Се појавија повеќе детали за убиствата и полициската операција што доведе до апсење на Брејвик. Полицијата соопшти дека полицајците, кои се обиделе да дојдат до островот, биле забавени бидејќи имале проблеми да најдат соодветен брод што ќе ги пренесе дотаму, а немало и полициски хеликоптери во непосредна близина.
Напаѓачот беше уапсен 90 минути по почетокот на масакрот. Полицијата наведе дека тој имал многу муниција, а извори од болницата посочија дека тој користел „дум-дум“ куршуми, дизајнирани да се распрснат во телото и да предизвикаат максимална внатрешна штета.
Една од првите жртви на островот бил полицаец што не бил на должност, а бил ангажиран од организаторот на кампот да ја осигури безбедноста, објави новинската агенција Ројтерс, цитирајќи ги властите. Полицијата соопшти дека не трагаат по втор напаѓач, но не ја исклучија можноста дека повеќе луѓе биле инволвирани, откако изјавите на очевидците имплицираа дека е можно да постои и втор напаѓач. (Би-Би-Си)
Сакал да убие стотици илјади
Норвешкиот масовен убиец Андерс Беринг Брејвик изработил документ насловен „2083 - Европска декларација за независност“, во кој стотици илјади Европејци осудува како предавници што треба да бидат егзекутирани.
Тој во својот „труд“ класифицира две групи предавници - „предавници од прва“ и „предавници од втора категорија“.
Во првата група предавници се вклучени политички лидери, вклучително и раководители на невладини организации, директори на медиуми, индустријалци и аналитичари. Сите овие, според Брејвик, треба да бидат егзекуирани поради нивното предавничко однесување и целиот нивен имот да биде конфискуван.
Во втората група предавници тој ги вклучува „политичарите-марксисти со мултикултурни погледи“ и голем број европратеници. И овие предавници, според Брејвик, треба да бидат казнети со смрт и нивниот имот на биде конфискуван.
|
