Насловна

Специјалецот што го усмрти Мартин има обожаватели на „Фејсбук“

МВР реагираше на групите за поддршка на Нешкоски, сега чека претставка од граѓаните

Горан Адамовски


„Игор Спасов (ветеран од 2001 година), кој свесно и недвосмислено го заложил својот живот за Република Македонија“. Ова е воведот во групата за поддршка на специјалецот Игор Спасов, осомничен дека пред педесетина дена брутално го претепа 22-годишниот Мартин Нешковски на плоштадот „Македонија“. Клубот за поддршка на Спасов, кој е во притвор, на „Фејсбук“ има повеќе од 1.200 члена. Групата предизвика огромен револт кај голем дел од младите, па на ѕидот може да се прочитаат постојани препукувања меѓу поддржувачите и оние против.

„Човечки е секогаш да се поддржи жртвата. Јас се одлучив токму за спротивното зашто се создаде огромна медиумска фама. Како што слушнав, починатиот имал, односно е идентификуван по отпечатоците на прстите, што значи, имал криминално досие. Ова ни еден медиум не го потенцираше подоцна. Зошто полицаецот бркал криминалец со досие, ме интересира и сакам да ја дознаам вистината, а не да паѓам на шпански серии. Ако има 22 години, не значи дека не е способен за злосторства“, пишува еден од фановите на Спасов.

„Полицаецот има право на адвокат и на судење. Другите права летнаа низ прозорец кога почна да го удира детето до смрт со боксови“, контрира друг интернетџија.

Поддржувачите на специјалецот, барајќи оправдание за насилството во ноќта кога се славеше изборната победа на ВМРО-ДПМНЕ, пишуваат дека тој бил „професионалец со многу големо искуство“.

„Се случи тоа што се случи. Игор Спасов имал конфликт со починатиот, брутално убиство нема. Дали некој се запрашал зошто Игор тргнал по него? Сигурно не за да си направи проблеми и компликации во животот, а најмалку да го убие малиот среде центар на Скопје“, уверуваат фановите.

„Ве читам и Ви се чудам... Па тој сам го призна убиството и треба да добие максимална казна. А гледам и кои го бранат - суспендирани полицајци! Срамота! Доживотна казна за убиецот“, реплицираат антиподдржувачите.

Ова е прва група за поддршка на специјалецот. Веднаш по злосторството, за кое на полицијата и' требаше два дена да го открие, на социјалните мрежи никнуваа низа групи против полициската бруталност. „Стоп за полициската бруталност“, „Поддршка за протестот против полициското насилство“, „Протести за Мартин Нешкоски“, се само дел од групите, кои имаа илјадници приврзаници. За чудо, тие набргу беа бришени. Министерството за внатрешни работи тогаш призна дека полицијата има замешано прсти во целата работа.

„МВР ги следи групите и профилите на сите учесници што повикуваат на протест. Министерството го известува ’Фејсбук‘ за сите оние групи што шират говор на омраза или насилство во јавноста и ’Фејсбук‘ автоматски ги брише таквите групи“, изјавуваа од полицијата.

Иво Котевски, помошник-министер за односи со јавноста при МВР, вели дека кај нив немало ниту една поплака или каква било претставка против групата за поддршка за Спасов.

„Да разјасниме уште еднаш: МВР не брише групи, туку реагира до ‘Фејсбук‘ ако во одредена група се шири говор на омраза, повикување насилство и слично. Доколку во групата што ја споменувате има вакви елементи, тогаш повторно ќе реагираме до ‘Фејсбук‘. Нашите надлежности на оваа социјална мрежа се идентични како и на кој било поединец, кој има шанса да ја пријави групата до ‘Фејсбук‘ доколку смета дека не треба да постои од која било причина“, ни изјави Котевски.

Како што е познато, полициската бруталност и обидот за забошотување на случајот беа повод за секојдневни протести низ скопските улици. Младите бараа итно распуштање на специјалната единица „Алфи“; лична одговорност на сторителот на убиството и неговите претпоставени, како и овозможување надворешна контрола над работата на полицајците. МВР, пак, смета дека за кратко време го расчистила случајот со тоа што го идентификувале и го уапсиле осомничениот за смртта на Нешкоски.

Во меѓувреме, случајот со Спасов се' уште е во истрага и во Судот се испитуваат сведоци на настанот.