Александра Велинова, водителка
Со прстен во книга ме побара за жена
ТВ-водителката открива дека во приватниот живот и' се случува ново поглавје. Од госпоѓица наскоро ќе стане госпоѓа
Катерина Шекеровска
Александра, како ти поминуваат летните месеци, ми изгледа како да нема одмор за утринската програма на ТВ Алфа?
„Летниот период ми поминува работно, бидејќи сум дел од контактно-забавната редакција на ТВ Алфа, која работи на подготовката на летната шема на емисијата ’Портик‘, што се емитува секојдневно од понеделник до петок. Покрај тоа што снимаме во студио, правиме репортажи и на терен, што значи дека секојдневно имам работни обврски кои, сепак, со задоволство ги извршувам зашто имаме прија��на атмосфера за работа во секој поглед“.
Како влезе во приказна со Алфа?
„Во Алфа сум од самиот почеток, а отворањето на телевизијата се совпадна со моето дипломирање на отсекот за новинарство на Правниот факултет. Она што особено ме радува е што сум дел од тимот во кој се практикува професионално, објективно новинарство, за какво што ни зборувале и професорите на факултет. Без какви било предрасуди при информирањето. Дозволената слобода при изразувањето, креативноста, обработувањето на широкиот спектар на теми од различни области е сосема доволен предизвик да продолжам да го работам она што го работам“.
Покрај обврските во телевизијата, имаш ли време за приватен живот? Ти си сестрана личност, пишуваш и поезија, водиш хуманитарни настани... Со што друго се занимаваш и што те интересира?
„Поезија и проза пишувам од основно и иако досега имам издадено само една книга во седмо одделение ’Најубавите години‘“, пишувам до ден-денес, бидејќи тоа е потреба, пред се', емотивно празнење, а до крајот на годинава се надевам ќе ги објавам песните што се пишувани во еден навистина тежок период од мојот живот. Сакам да читам и жал ми е што немам доволно време да го правам тоа, па некогаш се случува паралелно, додека завршувам други обврски, да читам, не заспивам без книга. Иако не сум спортски тип, сепак, знам да се размрдам со пешачење до Водно, возење ролери, многу сакам да пешачам...“
Неодамна твоето момче те изненади со свршенички прстен, а зад сето тоа има навистина интересна приказна... Ќе ми кажеш ли што се случуваше точно таа вечер?
„Во контекст на љубовта кон книгите, на 22 јуни седевме во еден од рестораните во Дебар Маало со друштво и некаде пред тргнување Оливер (свршеникот) ја стави книгата ’Како да се сака‘ од Ошо на масата... Ошо ми е еден од омилените автори и не ни одев подалеку со размислувањето освен „Еј Ошо, супер, ама го имам цел комплет од Ошо... Што му текнало да ми ја купи таа книга...“ , Оливер знае често да ме изненади со книги... Ја отворам и гледам на дното на вдлабнатиот круг во средина прстен... Беше навистина неочекувано... И додека јас занемена ја разгледувам книгата, тој беше клекнат и чекаше потврден одговор... Со измешани чувства реков ’да‘, а откако се приземјив, видов дека на книгата не пишува ’Како да се сака‘, туку ’Како да ме сакаш‘ и кориците не беа исти, тоа беше специјално издание од АЕА. Па девојки, внимавајте ако ја добиете ’Како да се сака‘ од Ошо да знаете што ве очекува, ха, ха, ха!“
Свадба па одмор, или одмор па свадба?
„Свадба, здравје, напролет за да имаме време да се организираме, бидејќи ова не беше планирано, а на одмор планираме да одиме од 10 август во Франција, Париз, Ница...“
|
