Поглед

Има ли спас од ѓубрето?

Гојко Ефтоски

Под превезот на претоварна станица за прибирање на дневниот отпад, низ Тетово кај железничката станица повторно се создава вистинска депонија.

Веќе пет години во неколку наврати овде се акумулираа огромни количини ѓубре, кои се искажуваат со илјадници тони. Најлоша беше состојбата во изминатата година кога огромните транспортери со месеци пренесуваа смет во депонијата „Русино“ кај Гостивар.

Со зафатите што заеднички ги договорија и ги извршија општините од Полошкиот регион и населбите, а пред се', градовите Тетово и Гостивар се сметаше дека го решиле проблемот со депонирање на сметот. Така уверуваа комуналците, но и градоначалниците. Се постигна спогодба сметот да се пренесува под одредени услови. Ова требаше да биде крај на маките и на опасностите што ги предизвикува дивото депонирање на комуналниот отпад.

Сепак, не е така. Во Тетово кај железничката станица повторно се создаваат брда од смет. Тоа веќе не е само претоварна станица од која сметот што се собира преку ден во текот на ноќта ќе се транспортира.

Напротив, повторно и постојано се акумулираат нови количини ѓубре. Тетовци се сведоци на создадени вистински брда од смет со сите опасности што демнат за здравјето на луѓето.

Во технологијата на собирање и депонирање на сметот сигурно е неминовна претоварна станица. Меѓутоа, во никој случај не може да стане збор за нејзино лоцирање во градска населба како што е примерот со Тетово.

Навистина, поднесено е барање за земјиште надвор од урбаниот градежен реон. Постапката започнува од првата наредна седница на Советот закажана за утре. Прашање е што ако постапката се завлече, ако потрае со месеци, а во тоа време се продолжи со таложење на отпадот на сегашната дива депонија.