Октоподот Пол типува на Шпанија

Фудбалските навивачи низ Германија се надеваат дека способноста за прогнозирање на октоподот Пол го напуштила откако тој предвиде пораз на германската репрезентација во денешниот полуфинален дуел со Шпанија на Светското првенство во Јужна Африка. Со стопроцентната успешност досега, родената во Велика Британија ѕвезда на аквариумот во Оберхаузен, западна Германија, стекна светска слава откако прогнозира низа победи на Германија, но и изненадувачкиот пораз од Србија во групната фаза.

Вчера на Пол му беше дадена уште една можност да избира меѓу двата пластични сада со храна спуштени во неговиот аквариум, едниот обележан со германското знаме, другиот со шпанското. Садот што Пол ќе ќе го отвори прв се смета за негов тип. Тој прво ги опфати двата сада, се колебаше за момент и потоа го отвори тој со знамето на Шпанија.

Одлуката на Пол беше пренесувана директно на повеќе телевизиски канали во Германија, при што коментаторите веднаш изразија сомнеж за прогнозата на октоподот роден во Вејмут, Англија. На тековниот Мундијал е безгрешен засега, но тој не е без мана - на Европското првенство 2008 тој неточно предвиде победа на Германија против Шпанија во финалето.