Црвенковски во Стразбур

Потребен е вистински дијалог

Црвенковски на средба со Штефан Филе и со европски парламентарци во Стразбур

Од нашиот дописник
Тони Гламчевски


Стразбур – Од македонските политички партии се бара вистински политички дијалог, без разлика дали партиите доаѓаат од опозицијата или од власта, е пораката што му беше пренесена на претседателот на СДСМ, Бранко Црвенковски, на средбата со Европскиот парламент во Стразбур.

Црвенковски вчера претпладне имаше средба со комесарот за проширување, Штефан Филе.

Веднаш по разговорите, Црвенковски во изјавата за медиумите нагласи дека не се зборувало околу датум за почеток на преговори, бидејќи, според него, Македонија е „многу далеку од тоа“. „Претпоставувам дека има многу други работи за да можеме да говориме за следниот чекор, а тоа е датум за почеток на преговорите. Не е само решавањето на спорот со Грција, туку и задоволувањето на критериумите пропишани од страна на Европската комисија во различни области“, рече тој.

Според лидерот на СДСМ, на разговорите со еврокомесарот било речено дека во некои областите „не само што не е забележан некој значителен напредок, туку има и одредени чекори што може да се толкуваат како враќање назад“. Во врска со политичкиот дијалог опозиција-власт, тој информирал дека СДСМ има два основни предуслова. Првиот предуслов е во Деловникот на Собранието да се вгради амандман со кој ќе се овозможи опозицијата, не само СДСМ, на секоја парламентарна седница да може да предлага една точка на дневен ред, околу која ќе дискутира парламентот. Вториот предуслов е дека парламентот мора да ја задржи можноста за контрола на извештаите од ревизорот во врска со трошењето државни пари.

Во однос на последниот инцидент во Собранието, Црвенковски им соопштил на своите соговорници во Стразбур дека во Законот за Собрание, во член 43, е наведено дека освен собраниското обезбедување, никој друг, ниту полицијата.

За лидерот на Црвенковски при последните инциденти во парламентот бил прекршен Законот за Собранието од страна на министерката за внатрешни работи. Нејзиното барање за казнување на пратениците е нонсенс, вели Црвенковски. „Тоа што министерката за внатрешни најавува казни за пратеници, тоа нема врска со парламентарна демократија, тоа може да се наслови како ’полициска држава’“.

Тој се сретна и со известувачот за Македонија при ЕП, Зоран Талер, со Ханес Свобода и со Едуард Кукан .

Од кабинетот на комесарот за проширување Штефан Филе дојде писмената реакција на средбата која тој ја имаше со Бранко Црвенковски во Стразбур. Во реакцијата се вели дека „се' што може да се каже во моментов е дека двајцата направија заедничка процена на ситуацијата во земјата во клучните области и реформите кои и' се потребни“.

Комесарот Филе, според неговиот кабинет, ја подвлекол важноста за широка политичка поддршка на агендата на реформи кои се однесуваат на европската интеграција на Македонија.

На средбите со европратениците станало збор и за внатрешната ситуација во земјата и за нејзините евроинтеграции

„Јас му go објаснив она што е став на Европската унија и Европскиот парламент дека за идната евроинтеграција на земјата изнаоѓањето решение за името на земјата е апсолутен предуслов за идниот чекор на Македонија во Европската унија“, изјави Едуард Кукан, известувач на пратеничката група на народните партии за Македонија.

Јоханес Свобода, првиот известувач во ЕП за Македонија, веднаш по разговорот со претседателот на СДСМ, Бранко Црвенковски, беше уште подиректен во однос на европската интеграција на земјата.

„Потребно е да се најде решение за името на Македонија, сега постои можност за договор меѓу Грција и Македонија, потребно е владите на двете земји да работат на изнаоѓање решение“.

Свобода признава дека е загрижен малку за ситуацијата во Македонија. „Загрижен сум поради то�� што владата е многу слаба во однос на реформите.“, нагласи Свобода.