Првин пари за отштета, па свидетелство

Моника Талеска


ПРИЛЕП - Петте средни училишта во Прилеп не ги даваат свидетелствата за завршена година на средношколците доколку првин не платат пари за отштета, чија висина ја утврдило училиштето. Во некои училишта, како што обвини вчера на прес-конференција општинската организација на СДСМ, се наплаќа по 100 денари, а во други и по 700 денари. Минатата година министерот за образование, Никола Тодоров, беше дециден дека свидетелствата мора да им се дадат на учениците, а училиштата не смеат да ги условуваат учениците.

Незадоволни родители реагираат и бараат примена на препораките на надлежното Министерство. „Ќерка ми заврши втора година во средното економско училиште ‘Кузман Јосифоски-Питу‘, но не доби свидетелство. И годинава како лани бараат 500 денари. Немам намера да плаќам, не го земаме свидетелството. Нека дојде септември, па тие нека ја запишат. На децата им бараат пари за книги што не ги добија и за компјутери што не ги користат“, изјави Михајло Тошески, родител.

Дека парите не им се вратени ниту лани потврдуваат многу ученици што сега се запишале на факултет. Една од нив е Бојана Митреска. „Бараа да платиме по 1.000 денари, а плативме 500 како прва рата. Потоа министерот кажа да ги вратат парите. Прашувавме во училиште, а од класната добивме одговор дека не знае каде да ги бараме парите. Тоа беше се', парите не се вратени“, вели Митреска.

Од општинската организација на СДСМ го повикуваат советникот за образование и надлежните да преземат соодветни мерки за да го решат овој проблем во прилепските средни училишта.

„Некои ученици им ги даваат парите на рака на класните раководители, некои плаќаат на сметка. Каде завршуваат парите?

Само лани во гимназијата „Мирче Ацев“ беа собрани околу 200.000 денари за отштета, а парите не им се вратени на учениците. На седницата одржана на 12 ноември минатата година претседателот на Советот, Димитар Стевананџија, кој е и професор во гимназијата, вети дека парите ќе им бидат вратени на учениците“, изјави Слободан Ристески од ОО на СДСМ.

Советникот за образование во прилепската локална самоуправа, Марјан Матракоски, нема информации ниту дека парите за отштета за лани не се вратени ниту дека годинава се повторува истата приказна.

„На директорите им е кажано дека учениците мора да ги добијат свидетелствата, а наплатата на отштета можат да ја реализираат во друга постапка“, вели Матракоски.

Од Министерството за образование информираат дека условувањето на свидетелствата со исплата на отштета е незаконско и оваа постапка мора итно да се стопира. Доколку учениците предизвикале соодветна штета, наплатата се реализира во друга постапка и не на крајот, туку во текот на учебната година кога е предизвикана.