Се трага по спасоносната формула за анкетна комисија

Трајко Вељаноски треба да биде доволно умешен да ги реши проблемите

Оливера Војновска



Власта и опозицијата имаат 24 часа за да се договорат околу содржината на одлуката за формирање анкетна комисија за собранискиот инцидент, за да може ова специјално парламентарно тело да добие верификација на седницата закажана за утре. СДСМ предлага прецизна формулација и бара „основање анкетна комисија за расчистување на инцидентот и утврдување политичка одговорност за учесниците во инцидентот, за грубо прекршување на член 43 од Законот за Собрание и испитување на сите околности поврзани со инцидентот“. ВМРО-ДПМНЕ и ДУИ инсистираат на тоа комисијата да има поширок мандат, да биде целосно автономна и со називот априори да не се сугерира вина и прекршување на законите. Претседателот на Собранието, Трајко Вељаноски, сепак, е оптимист дека пратеничките групи денеска ќе ја најдат спасоносната формула за именувањето на самата одлука за анкетната комисија. Како компромисно решение спикерот предлага анкетната комисија да биде формирана по пример на онаа за тепачките во парламентот во 2007 година. Односно, текстот на одлуката да биде насловен како „утврдување на околностите за настанот во Собранието случен на 1 јули и на одговорноста на учесниците“. Меѓутоа, ова не било прифатливо за опозицијата.

„Убеден сум дека доколку и' мислиме добро на Република Македонија координаторите на политичките партии до утре, сепак, ќе размислат и ќе прифатат решение со кое ќе се овозможи да се формира анкетна комисија, која ќе даде свои резултати, а ние како Собрание да продолжиме со редовно работење“, изјави Вељаноски по вчерашната тричасовна координација, која не резултираше со договор. И покрај тоа, парламентарниот спикер оцени „средбата е добар сигнал, бидејќи на неа по подолго време учествувале и координаторите од опозицијата“.

На координацијата кај Вељаноски присуствуваа потпретседателите на Собранието, Светлана Јакимовска, Рафиз Алити и Јани Макрадули, како и пратениците Цветанка Иванова од СДСМ, Горан Мисовски од НСДП, Илија Китановски од ВМРО-ДПМНЕ и Сафет Незири од ДУИ.

Макрадули по средбата изјави дека заложбите на ВМРО-ДПМНЕ и на Вељаноски за расчистување на инцидентот биле само декларативни. Според него, тие ги ставиле партиските интереси над државните со тоа што не се оградиле од „недоличното писмо од Јанкуловска до Вељаноски, ниту го заштитиле Собранието од партиско-владиниот пуч“.

„Денеска мнозинството донесе одлука да се прикрие вистината. ВМРО-ДПМНЕ не успеа да стави камче во градењето политички дијалог, од едноставна причина да се скрие вистината и да не се дебатира кој го прекршил член 43 од Законот за Собрание“, рече Макрадули. Тој ги повика ВМРО-ДПМНЕ и Вељаноски „во следните 24 часа да размислат и да направат чекор што ќе ја поправи сликата за Македонија во ЕУ“.

Пратеникот од НСДП, Мисовски, изјави дека со „одбивањето на предлогот за формирање анкетна комисија предложен од опозицијата, Вељаноски и ВМРО-ДПМНЕ испратиле јасна порака дека целиот инцидент бил режиран во врвот на ВМРО-ДПМНЕ, а реализиран од страна на полицијата.

Заменик-координаторот на пратеничката група на ВМРО-ДПМНЕ, Китановски, смета дека СДСМ и' наложува на комисијата да дејствува по конкретен член од конкретен Закон.

„Со предлогот на СДСМ се ограничуваат дејствувањето и самостојноста на анкетната комисија. ВМРО-ДПМНЕ останува отворена за формирање комисија, која ќе го испита целиот случај и ќе ја лоцира политичката одговорност на оние што го предизвикале“, рече тој. За него е бесмисле��о барањето на опозицијата Вељаноски да се огради од писмото на министерката за внатрешни работи, Гордана Јанкуловска, испратено до парламентот.

„Не може да се оградите од нечиј допис или став. Тоа може да го направи само оној што го издал. Тоа е бесмислено и е класична замена на тези. Не е работа на Собранието да се оградува од придружни писма што ги добива секојдневно неговиот претседател“, додаде Китановски.

Пратеникот Незири од ДУИ нагласи дека неговата партијата смета оти анкетната комисија не треба да има ограничувања во своето работење во врска со инцидентот што се случи во парламентот. „ДУИ бара поголема автономија на анкетната комисија, а не да се задржи работењето на комисијата во согласност со член 43 од Законот за Собрание“, изјави Незири.

Учесниците на вчерашната средба воопшто не успеале да разговараат за персоналниот состав на комисијата и за тоа кој ќе раководи со неа. Инаку, СДСМ за оваа позиција го предлага либералот Стојан Андов, додека ВМРО-ДПМНЕ е за Павле Трајанов од Демократски сојуз.