Коштуница ќе го решава дуелот меѓу Тадиќ и Николиќ

Сакавме да го поддржиме Тадиќ, но... Коштуница и Илиќ

Премиерот пропушти не само да го поддржи Тадиќ, туку и да објасни зошто не може да го поддржи Николиќ

Белград - Решението на српскиот премиер Воислав Коштуница да не го поддржи Борис Тадиќ во вториот круг претседателски избори в недела, телевизиската дебата меѓу двајцата кандидати за претседателската функција и започнатите разговори Србија-ЕУ за либерализација на визниот режим се главни теми во српските весници, еден ден пред молкот што започнува денес - 48 часа пред вториот круг претседателски избори.

„Со откажувањето да го поддржи коалицискиот партнер Борис Тадиќ, Воислав Коштуница пропушта во вториот круг да ја поддржи и нивната заедничка политика“, пишува весникот „Политика“.

Минатите три години двајцата, како лидери на две сродни демократски партии, со помала или поголема соработка, успеваа да се обединат околу главната политика за Косово. Коштуница пропушти не само да го поддржи Тадиќ туку тој ја пропушти можноста да објасни зошто не може да го поддржи Томислав Николиќ. Во историјата Воислав Коштуница ќе се запамети како човек кој со победа над Слободан Милошевиќ и донесе демократија на Србија.

Со завчерашниот телевизиски дуел кандидатите требаше да се обидат да го убедат народот, кој се уште не решил за кого ќе гласа, пишува „Политика“.

И двајцата кандидати се обидоа да ги придобијат бирачите на коалицијата Демократска партија на Србија - Нова Србија. Тадиќ се повика на заедничката политика со премиерот за прашањето за Косово, а Николиќ се заблагодари на Коштуница и Велимир Илиќ што не го поддржале Тадиќ, имено, поради косовското прашање.

И двајцата кандидати изјавија дека нема да испратат српската армија во војна, наведува „Блиц“.

Весникот пишува дека еврокомесарот за правда, слобода и безбедност, Франко Фратини, истакнал дека Србија  е првата земја од Западен Балкан, со која започнуваат такви преговори и тоа е јасна политичка порака.

Тој посочи дека „го прифатил ризикот да каже дека визите ќе бидат укинати во 2009 година“, но, сепак, не се знае кога ќе се случи тоа поради повеќе услови кои Србија треба да ги исполни и кои се однесуваат, пред се', на безбедноста на границите.

Фратини  истакна дека привремената спогодба за соработка со ЕУ, која Србија би требало да ја потпише на 7 февруари, е многу важна поради тоа што во неа прв пат се спомнува „членство“.

Од друга страна, српскиот вицепремиер Божидар Ѓелиќ наведува дека Србија ќе ги исполни сите услови за укинување на визите  до крајот на 2008 година, ако Тадиќ победи на изборите, додека роковите не се јасни  ако победи другата алтернатива, пишува „Блиц“.

Кандидатите за претседател на Србија, Борис Тадиќ и Томислав Николиќ, во телевизиски дуел во средата разменија мислења за прашањето на ЕУ, Косово, Хаг и други важни внатрешни, надворешни и економски теми. Додека демократот Борис Тадиќ како стартегиски цели на својата политика ги изнесе понатамашното приближување кон ЕУ, подобрување на животниот стандард и спречување на изолацијата на земјата каква што постоеше во деведесеттите години, радикалот Николиќ  истакна дека покрај економскиот напредок, за земјата е важно подеднакво добро да соработува и со ЕУ и со Русија, но и да го смени претседателот, кој, според неговата оцена, не донел ништо добро.

Кандидатот на Српската радикална партија тврдеше дека цела кампања на Тадиќ се заснова на тоа тврдење.

 - Вие кампањата ја засновате на заплашување на луѓето со мојата победа, констатира Николиќ и додаде дека „Србија никогаш нема да биде руска губернија, но ни европска колонија“.

Тој го осуди Тадиќ поради тоа што кампањата и телевизискиот дуел ги заснова на критики на лидерот и додаде дека Тадиќ би требало повеќе внимание да посвети на проблемите кои се случиле во земјата ��о 2000 година, апострофирајќи на корупцијата како еден од клучните проблеми.

- Се согласувам дека корупцијата е огромен проблем, но таа се случи во изолацијата во деведесеттите години. Тогаш се случувале и ѕверски убиства...Не го спомнувам Шешељ приватно, туку неговата политика, одговори Тадиќ. (МИА)

Тадиќ: Никогаш нема да се откажам од Косово

Приштина- Актуелниот претседател на Србија и кандидат за реизбор на функцијата, Борис Тадиќ ја посети најмалата српска енклава на Косово, Церница, кај Гњилане, каде порача дека никогаш нема да се откаже од Косово.

Тадиќ истакна дека како претседател ќе стори се "Србите и Србија да постојат на Косово и Метохија".

Тој во Церница во училишниот двор беше пречекан од српските деца со нивните родители и роднини, облечени во народни носии со погача и сол, со развеано знаме на Србија и со химната "Боже правде", која Тадиќ ја отпеа со нив.

- Косово мора да не обедини и само заедно, единствено можеме да обезбедме сигурна и подобра иднина за сите. Никогаш нема да ја прифатам независноста на Косово и Метохија, изјави Тадиќ.

Тој додаде дека нема да ја турка земјата во војни, туку ќе трага по мирно решение преку преговори.

Тадиќ потенцираше дека мора да се грижи за човечките животи, бидејќи "интересот на државата мора да биде интересот на секој наш човек".

- Ние од нашето Косово и од нашите луѓе никогаш нема да се откажеме и јас ќе сторам се ние да постоиме тука и Србија да постои тука, порача Тадиќ.

Во врска со мисијата на ЕУ на Косово, Тадиќ нагласи дека секој кој сака да дојде на Косово со цел да придонесе за сигурноста и безбедноста, тоа може да го стори само преку Советот за безбедност на Обединетите нации. (МИА)