Поглед

Лекарите куртулија

Мирче Јовановски

Лекарите, барем засега, куртулија. Издавањето лиценци останува во домен на нивните еснафски здруженија, а не како што на препад се обидоа да издејствуваат група пратеници од владејачките ДПА и ВМРО-ДПМНЕ за тоа да се грижи Министерството за здравство.

Предлогот отпадна, но не и дилемите за мотивите што ги натераа пратениците да се заложат за решение кое толку ги разжести лекарите. Дали станува збор за сериозни анализи кои ги имале предлагачите? Можеби навистина лекарската струка ќе се унапреди со ваквиот трансфер на надлежностите. Можеби сето тоа ќе резултира со поквалитетни услуги кои ги добиваат пациентите. Но, за такво нешто, барем во јавноста, не стигнаа сериозни аргументи.

Повеќе образложенијата личеа на невешто елаборирање од типот дека „така е во други земји“ и дека новиот начин на издавање лиценци, всушност, ќе им олесни на лекарите да добиваат доживотни лиценци.

Ако е навистина така, прашање е зошто тогаш се кренаа толку жестоко луѓето од медицинската струка. Зарем тие би работеле сами против своите интереси?

Впечаток е, сепак, дека политиката и овој пат ги замеша своите прсти и желбата да го има конечниот збор во чисто стручни работи. И дека предлогот, всушност, е добро спакуван пробен балон.

Така, политиката и овој пат посегна по чисто стручни елементи како што се лиценците за вршење на дејноста. На лекарите им требаше многу време да се стекнат со таквите надлежности, за што потрошија многу време, анализи и јавни дебати. Оттаму, тешко е да се поверува дека лесно ќе се откажат од јавните овластувања.